តាមក្បួន៖ បើមិនដករបស់ ៤ នេះចេញពីលើតុ ទោះខំរក ខំធ្វើប៉ុណ្ណា ក៏អត់សល់លុយដែរ
សូមពិនិត្យមើលនៅលើតុធ្វើការរបស់អ្នក ប្រសិនឃើញមានរបស់ ៤ ដូចខាងក្រោម ត្រូវតែប្រញាប់ដកវាចេញ ព្រោះអីតាមក្បួនហុងស៊ុយរបស់ទាំងនោះ មិនបាននាំភាពចម្រុងចម្រើន តែបែរជាបង្កជាគ្រោះដល់អាជីពការងារ និងប្រាក់ចំណូលអ្នកទៅវិញ៖
៤) ប្រភេទផ្កាជ័រ
មនុស្សជាច្រើនចង់តុបតែងលើតុការងារ ក៏ទៅទិញផ្កាជ័រមកដាក់តាំង ដោយមើលទៅឃើញស្អាត តែតាមក្បួនហុងស៊ុយ ភាពមិនរស់រវើក ជាការពិតនោះ គឺទាក់ទាញសំណាងអាក្រក់ មករកម្ចាស់ទៅវិញ។
ដូច្នេះអ្នកគួរតែជៀសវាងការដាក់របស់ក្លែងក្លាយ ឬរបស់ជ័រលើតុ បើអាចសូមប្រើប្រាស់ផ្កាឬរុក្ខជាតិស្រស់ ពិតៗ ដើម្បីទាញយកថាមពលវិជ្ជមានមកក្នុងជីវិត។
៣) ដើមដំបងយក្ស
ដើមដំបងយក្ស បង្ហាញពីភាពមុត ភាពស្រួច តាមក្បួនហុងស៊ុយ គឺធ្វើឲ្យផ្លូវចិត្តឆាប់ប៉ះទង្គិច ថាមពលរាងកាយឆាប់ចុះទ្រុឌទ្រោម ធ្វើឲ្យអាជីពការងារមានការចុះថមថយ ពោលគឺមិនមែនជារបស់ល្អ សម្រាប់ដាក់តាំងលើតុការងារនោះឡើយ។
២) ប្រភេទវល្លិ
ប្រភេទរុក្ខជាតិវល្លិ ក៏មិនគួរដាក់នៅលើតុដែរ ត្បិតវាមានប្រសិទ្ធភាពក្នុងការបន្សុទ្ធខ្យល់ តែរបស់នេះតាមក្បួន គេតំណាលមកថា ងាយធ្វើឲ្យកន្លែងធ្វើការមិនចុះសម្រុងគ្នា ងាយប៉ះមាត់ប៉ះក ប៉ះពាល់ដល់សំណាង។
បើចង់បានរុក្ខជាតិ ដាក់តាំងលើតុ ល្អបំផុត គឺត្រូវជ្រើសរើសយកប្រភេទរុក្ខជាតិពិត មានស្លឹកធំ បញ្ចៀសរុក្ខជាតិមានស្លឹកស្រួច។
១) របស់តាំងមានរូបរាងស្រួច
មិនថាតែប្រភេទថូផ្កា ឬរុក្ខជាតិនោះទេ ដោយឡែកវត្ថុលោហៈដែលមានរាងស្រួចៗ ក៏តែងតែនាំឲ្យយើងប៉ះពាល់ផ្លូវអារម្មណ៍ និងថាមពលវិជ្ជមានត្រូវបានបន្សាបអស់ផងដែរ។ វាក៏ងាយនឹងនាំឲ្យម្ចាស់ មានការជាប់ជំពាក់ មានជម្លោះ មិនចុះសម្រុងនឹងកន្លែងធ្វើការជាដើម។
សរុបមកវិញ បើសួរថា តើរុក្ខជាតិប្រភេទណាដែលយើងណែនាំឲ្យដាក់តាំងនៅលើតុ ហើយវាល្អចំពោះក្បួនហុងស៊ុយ និងជួយលើកយីអ៊ុន ឲ្យអាជីពការងារ ការរកស៊ីដើររលូន គឺរួមមាន៖
ប្រទាលរីករាយ: យោងតាមក្បួនហុងស៊ុយ ប្រទាលនេះត្រូវបានគេចាត់ទុកដូចជាមេដែកស្រូបលុយ ដោយសារស្លឹកវាស្រដៀងទៅនឹងកាក់ប្រាក់។ ប្រសិនបើអ្នកចង់លម្អរតុការងារដោយប្រទាលនេះគួរជ្រើសរើសដើមដែលមានពណ៌បៃតង និងគ្មានស្លឹកលឿង។ ប្រទាលនេះងាយស្រួលថែទាំណាស់ត្រឹមតែស្រោចទឹកឱ្យបានគ្រប់គ្រាន់ និងចៀសវាងពីពន្លឺព្រះអាទិត្យដោយផ្ទាល់ដើម្បីឱ្យនៅពណ៌បៃតង។
ដើមត្រចៀកក្រាញ់: នេះក៏ជារុក្ខជាតិដាំលុយមួយទៀតដែរ ល្បីរន្ទរឿងប្រាក់កាស និងភាពជោគជ័យ។ ដើមនេះមានស្លឹករាងមូលដូចកាក់តំណាងឱ្យភាពសម្បូរបែប និងភាពរុងរឿង។ ដើមនេះមិនចាំបាច់ថែទាំឱ្យស្មុគស្មាញទេ គ្រាន់តែត្រូវពន្លឺមធ្យម ដូចជានៅលើតុធ្វើការជាដើម។ នៅពេលក្រឡេកមើលវា អ្នកនឹងមានអារម្មណ៍ធូរស្រាល និងកាត់បន្ថយភាពតានតឹងបានទៀតផង។
ដើមរាសី: នេះជារុក្ខជាតិនាំសំណាងតាមក្បួនហុងស៊ុយ តំណាងឱ្យទ្រព្យសម្បត្តិ និងកូនចៅ។ បើនៅលើតុមានត្រឹមតែដើមរាសីមួយដើម ក៏អាចជួយទាក់ទាញថាមពលវិជ្ជមានដល់អ្នក។ ចំណុចពិសេសនៃដើមរាសី គឺចំនួនមែកអាចប្រាប់ពីអត្ថន័យផ្សេងៗគ្នា។ បើចង់បានសុខភាពល្អ សម្បូរលុយចាយ និងអាយុយឺនយូរ អ្នកគួរជ្រើសរើសដើមណាដែលមាន 3, 5, ឬ 9 មែក។
ផ្កាអ័រគីដេ: រុក្ខជាតិនេះនឹងបង្កើតបរិយាកាសអំណោយផលក្នុងកន្លែងការងារ។ ជួយបង្កើនថាមពល ហៅលុយ ហៅលាភសំណាងឱ្យមករកអ្នកជានិច្ច។ ដើម្បីផ្សងសុំសេចក្តីសុខ អ្នកគួរជ្រើសរើសផ្កាអ័រគីដេពណ៌ស។ ដើម្បីបានសំណាងល្អត្រូវជ្រើសរើសផ្កាអ័រគីដេពណ៌ស្វាយ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
