ជំពាក់គេទុកមួយឡែក ក្លឹប Barca មើលឃើញគោលដៅធំ ៣ ចង់ឲ្យយកបាននៅឆ្នាំក្រោយ
ក្លឹប Barcelona ដ្បិតបើបច្ចុប្បន្ននៅជាប់ជំពាក់លុយគេខ្ទង់ពាន់លាន តែការអភិវឌ្ឍក្រុមនៅតែជារឿងសំខាន់ដែលមិនអាចផ្អាកបាន ដូច្នេះមានតែបន្តទាំងត្រដរខ្យល់ តាមអ្វីដែលមានជាបន្តបន្ទាប់។
ជាក់ស្តែងបើតាមសារព័ត៌មាន Mundo Deportivo ចុះផ្សាយថា ក្លឹបអ្នកមានបុណ្យរបស់អេស្ប៉ាញ បានសម្លឹងឃើញគោលដៅធំ ៣ ចង់យកឲ្យបាននៅរដូវក្តៅ ឆ្នាំក្រោយ ២០២២ ដោយរួមមាន Erling Haaland, Paul Pogba និង Dani Olmo។
សម្រាប់ករណីរបស់ Haaland គេនឹងដំណើរការតម្លៃផ្តាច់កុងត្រា ៧៧ លានផោននៅពេលខាងមុខ ដូច្នេះប្រសិនណា Release Clause ចាប់ផ្តើមបើកហើយ គឺមានន័យក្លឹបដែលចង់បាន អាចនាំយកត្រឹមតម្លៃកំណត់ប៉ុននោះបាន ពោលស៊ីសងតែលើការចរចា និងសម្រេចពីភាគីកីឡាករថាចង់ទៅក្លឹបណាមួយប៉ុណ្ណោះ។ ដូច្នេះ Barcelona ក៏នឹងចូលប្រជែងក្នុងឱកាសដ៏ល្អមួយនេះផងដែរ។
ទៅមើល Paul Pogba ប្រសិនការចរចាកុងត្រាថ្មីជាមួយ Man Utd មិនអាចសម្រេចទៅបាន នោះការផ្ទេរឥតតម្លៃខ្លួន ក៏ពិតជានឹងអាចកើតឡើងបានដូចគ្នា ហើយក្លឹប Barcelona ចាំតែចរចាលើកិច្ចព្រមព្រៀងថ្លៃពលកម្ម និងគោលការណ៍មួយចំនួនផ្សេងទៀត។
ចុងក្រោយគឺខ្សែបម្រើប្រយុទ្ធ Dani Olmo តាមពិតទៅគេជាអតីតកីឡាករនៅថ្នាល La Masia របស់ Barcelona ទេ តែត្រូវបាន Dinamo Zagreb ចរចាយកបាន ហើយឥឡូវកំពុងឈរជើងឲ្យ RB Leipzig។ យ៉ាងណាដោយមើលឃើញគុណភាពរបស់គេលេងបានល្អ អ៊ីចឹងក្លឹបក៏នឹងសាកល្បងចូលទៅចរចា លើតម្លៃផ្ទេរល្បាក់ ៥០ លានអឺរ៉ូ ណាមួយបើកីឡាករចង់វិលមកទ្រនំចាស់ នោះគេនឹងមិនរុញរាឡើយក្នុងការចាកចេញពីក្លឹបនៅប្រទេសអាល្លឺម៉ង់៕
ប្រភព៖ Goal
ព័ត៌មានថ្មីៗ
