Spurs/Juve និង Bayern សម្លឹងឃើញក្របីព្រៃដែលពូកែតាមបិទ នៅ PL មួយរូប
ក្លឹបធំៗ ៣ មាន Tottenham Hotspur, Juventus និង Bayern Munich បានកំពុងដាក់រ៉ាដាដូចគ្នា ទៅលើខ្សែការពារដ៏រឹងមាំរបស់ក្លឹបតោខៀវ Chelsea ខណៈដែលសុពលភាពកុងត្រារបស់គេត្រូវផុតនៅចុងខែមិថុនា ឆ្នាំ ២០២២ ខាងមុខ។
នោះគឺកីឡាករ Antonio Rudiger ដែលបុរសមាឌឌាំងរូបនេះ ត្រូវបានអ្នកគាំទ្រដាក់រហស្សនាមឲ្យថា ជាក្របីព្រៃ ដ៏រឹងមាំនៅជញ្ជាំងការពាររបស់តោខៀវ ហើយជាចំណែកសំខាន់ជួយក្រុមលើកពាន UEFA Champions League រដូវកាលចាស់។
បុរសវ័យ ២៨ ឆ្នាំ កំពុងល្ហិចល្ហៀងថាក្លឹប Chelsea តាមផ្តល់សំណើចរចាកុងត្រាថ្មីដែរ តែកីឡាករផ្ទាល់មិនទាន់សម្រេចចិត្តថា ព្រមឬបែបណាឡើយ។ ឆ្លៀតពេលដ៏ល្អនេះ ក្លឹបធំៗដូចបង្ហាញខាងលើក៏ចូលមកចរចាជាមុន តាមរយៈសំណើអាចផ្តល់ឲ្យផ្សេងៗពីគ្នា ដើម្បីអូសទាញចិត្តកីឡាករអាល្លឺម៉ង់ឲ្យចេញពី Stamford Bridge នៅបញ្ចប់រដូវកាល។
គួររំឭកថា Rudiger គេបង្ហាញខ្លួនសរុប ១៥៦ ប្រកួត រកបាន ៨ គ្រាប់និង Assist ៣ លើកឲ្យក្លឹប។ គេបានស្គាល់រសជាតិលើកពានរង្វាន់ជាច្រើនជាមួយ Chelsea មានតាំងពី UCL, FA Cup, Super Cup និង Europa League ជាដើម។ អតីតកាលគេក៏ធ្លាប់ជាកីឡាករឲ្យលីគអាល្លឺម៉ង់នៅក្លឹប Stuttgart និង Dortmund ផងដែរ ខណៈនៅលីគអ៊ីតាលីឆ្លងកាត់ជាមួយក្លឹប AS Roma៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
