Evra ថា Sir Alex ចូលនិវត្តមុនកាលកំណត់ ព្រោះយក ២ រូបនេះ ចូលក្លឹបអត់បាន
បើតាមការទម្លាយពីអតីតកីឡាករជើងចាស់នៅ Man Utd លោក Patric Evra បានឲ្យដឹងថា លោក Sir Alex Ferguson សម្រេចប្រកាសចូលនិវត្តនៅឆ្នាំ ២០១៣ គឺជារឿងដែលមិនបានព្រាងទុក ព្រោះអីតាមថាលោកត្រូវនៅយូរជាងហ្នឹងច្រើនឆ្នាំទៀត។
វាមានមូលហេតុនៅពីក្រោយនោះ ហើយក៏ដោយសារលោកមិនអាចសម្រេចការនាំយកកីឡាករដែលលោកគិតថា អាចជួយក្លឹប Man Utd លើកពាន UEFA Champions League សារជាថ្មីបាន។ បញ្ជាក់ថា បិសាចក្រហមលើកពានអឺរ៉ុបលើកចុងក្រោយនៅឆ្នាំ ២០០៨ ហើយកាលពីឆ្នាំ ២០១៣ ដែល Sir Alex ចូលនិវត្តគឺជាការលើកពាន Premier League លើកចុងក្រោយ រាប់មកទល់បច្ចុប្បន្ន។
តាមការឲ្យដឹងពី Evra និយាយ៖ "២ សប្តាហ៍មុនគាត់ចូលនិវត្ត ខ្ញុំចាំបានថា សារព័ត៌មានជាច្រើនចុះផ្សាយថា Ferguson នឹងប្រហែលចូលនិវត្តឆ្នាំក្រោយ តែគាត់ផ្ទាល់និយាយមកខ្ញុំ គឺគាត់នឹងមិនចូលនិវត្តទេ ពោលគឺ ១០ ឆ្នាំទៀតឯណោះ"។
លោកបន្ត៖ "គាត់ក៏និយាយមកខ្ញុំ ថាគាត់ចង់បាន Cristiano Ronaldo និង Gareth Bale ព្រោះ ៩៩ ភាគរយ ពួកគេនឹងអាចជួយក្លឹបលើកពាន Champions League ម្តងទៀតបាន តែសោកស្ដាយក្រោយមកគាត់ក៏បានចូលនិវត្ត ហើយក៏បាននិយាយសុំទោសអ្នករាល់គ្នាដែរ"។
បញ្ជាក់ថា កំឡុងពេលដែល Sir Alex ចង់បាន Ronaldo និង Gareth Bale គឺជាពេលដែលពួកគេ ឡើងជើងខ្លាំង ហើយកំពុងឈរជើងឲ្យក្លឹប Real Madrid រួចក៏ជាយុគសម័យមាសរបស់ Madrid បានចាប់ផ្តើមលើកពាន UCL ជាបន្តបន្ទាប់ច្រើនឆ្នាំជាប់គ្នារាប់ពីពេលនោះមក៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
