Juve ចង់ខ្ចីជើងប្រយុទ្ធពី R.Madrid មួយរូប មកបំពេញចន្លោះរបស់ Cristiano Ronaldo
ក្លឹបសេះបង្កង់ Juventus ត្រូវបានគេរាយការណ៍ថា នៅតែមើលឃើញចន្លោះប្រហោងដែលមិនទាន់អាចបំពេញបាន បន្ទាប់ការចាកចេញរបស់ Cristiano Ronaldo ទៅកាន់ក្លឹប Man Utd កាលពីដូវក្តៅ។
យ៉ាងណាតាមរបាយការណ៍ចុងក្រោយចុះផ្សាយពី Calciomercato បានឲ្យដឹងថា ក្លឹបសេះបង្កង់ ដឹកនាំដោយអ្នកចាត់ការលោក Massimiliano Allegri ហាក់ចាប់អារម្មណ៍លើខ្សែប្រយុទ្ធ Luka Jovic របស់ក្លឹប Real Madrid ដោយមើលឃើញពីសមត្ថភាពរបស់គេ ហើយចង់ខ្ចីជើងរយៈពេលកន្លះរដូវកាល រាប់ចាប់ពីខែមករា ឆ្នាំ ២០២២ ដល់បញ្ចប់រដូវកាល។
យ៉ាងណាក្លឹប Real Madrid មិនទាន់សម្រេចថាបែបណាទេ តែតាមដឹងប្រហែលក្លឹបចង់ឲ្យ Juventus ចាយលុយទិញផ្តាច់ច្រើនជាងខ្ចីជើង ព្រោះអីក្រោមការដឹកនាំរបស់លោក Carlo Ancelotti លោកហាក់មិនដាក់ឈ្មោះ Jovic ទៅក្នុងផែនការណ៍ប្រកួត នារដូវកាលនេះឡើយ។
បញ្ជាក់ថា ខ្សែប្រយុទ្ធវ័យ ២៣ ឆ្នាំ ទើបតែផុតកុងត្រាខ្ចីជើងពីក្លឹប Frankfurt ដែលផ្ទេរទៅលេងនៅក្លឹបចាស់គេធ្វើបានល្អ ហើយឥឡូវមកដល់ក្លឹបថ្មី គេមិនទាន់មានឱកាសជាប់ជម្រើសដំបូងនៅឡើយ ពោលត្រឹមប្តូរចូលលេងបម្រុងឈរជើងតែ ៩ នាទីនៅការប្រកួត ២ លើក។ សុពលភាពកុងត្រារបស់ខ្សែប្រយុទ្ធស៊ែបី ត្រូវផុតនៅចុងខែមិថុនា ឆ្នាំ ២០២៥ តែតាមហាងឆេងថ្លៃខ្លួនរបស់គេ គឺទាបត្រឹមតែជាង ២០ លានអឺរ៉ូ៕
ប្រភព៖ Calciomercato
ព័ត៌មានថ្មីៗ
