មិនមែន PSG/Real Madrid តែភ្នាក់ងារថា Pogba អាចនឹងផ្ទេរទៅក្លឹបមួយនេះច្រើនជាង
តារាឆ្នើម Man Utd គឺខ្សែបម្រើ Paul Pogba មានភាគរយខ្ពស់ អាចជានឹងចាកចេញ ច្រើនជាងការបន្តនៅ បន្ទាប់ពីត្រូវផុតកុងត្រានៅចុងខែមិថុនា ឆ្នាំ ២០២២ ខាងមុខ។ មានរ៉ាដាក្លឹបជាច្រើន ដែលសម្លឹងចង់បានកីឡាករបារាំង ហើយសុទ្ធតែបណ្តុំក្លឹបយក្ស រំពឹងហ៊ានឲ្យថ្លៃពលកម្មកប់ពពក។
យ៉ាងណាបើតាមការបញ្ជាក់ពីភ្នាក់ងារលោក Mino Raiola បានបង្ហើបកន្លងទៅនេះ ថាក្លឹបដែល Pogba ទំនងជានឹងផ្ទេរទៅចូលរួម មិនមែនជា Paris Saint-Germain, Real Madrid ឬ Barcelona នោះទេ ផ្ទុយទៅវិញគឺជាក្លឹបចាស់ Juventus។
Raiola និយាយប្រាប់សារព័ត៌មាន Rai Sport ដូច្នោះថា៖ "Paul Pogba គេនឹងត្រូវផុតកុងត្រានៅខែមិថុនា ហើយយើងនឹងជជែកជាមួយ Man Utd ថានឹងគួរធ្វើបែបណាបន្តទៀត"។
លោកសង្កត់ធ្ងន់៖ "ការផ្ទេរទៅ Juventus? សម្រាប់ Paul គឺគេស្រលាញ់ទីក្រុង Turin ខ្លាំងណាស់ ដូច្នេះភាគរយខ្ពស់នៃការវិលត្រលប់របស់ Pogba ទៅ Juventus គឺពិតជាអាច តែវាស៊ីសងលើផែនការណ៍របស់ក្លឹបនៅអ៊ីតាលីមួយនោះដែរ"។
គួររំឭកថា Pogba មុនផ្ទេរមក Man Utd គេធ្លាប់ជាអតីតកីឡាករឆ្នើមនៅសេះបង្កង់ ដោយបានចាយពេល ៤ ឆ្នាំ ហើយឈ្នះពានរង្វាន់លីគកំពូល Serie A ៤ លើក និង Coppa Italia ២ លើក៕
ប្រភព៖ RaiSport
ព័ត៌មានថ្មីៗ
