ក្រោយឃើញឡើងជើងខ្លាំង Klopp ទទូចឲ្យ Liverpool បើកការចរចាយកអតីតកូនក្រុមខ្លួនមួយរូប
បើតាមសារព័ត៌មាន Fichajes បានចុះផ្សាយថា លោក Jurgen Klopp ហាក់កំពុងនឹកនាដល់អតីតកូនក្រុមចាស់មួយរូបរបស់ខ្លួន ដោយចង់ឲ្យក្លឹប Liverpool បើកការចរចានាំយកគេមកពង្រឹងតំបន់ប្រយុទ្ធនៅពេលខាងមុខ។
នោះគឺ Robert Lewandowski ជាខ្សែប្រយុទ្ធកំពុងឈរជើងឲ្យក្លឹប Bayern Munich ហើយប៉ុន្មានឆ្នាំចុងក្រោយគេឡើងជើងខ្លាំង ពោលអាចរកបានគ្រាប់បាល់ជាបន្តបន្ទាប់ និងធ្លាប់ជួយក្រុមលើកពាន UEFA Champions League ថែមទៀតផង។ កីឡាករសញ្ជាតិប៉ូឡូញធ្លាប់ជាអតីតកូនក្រុមលោក Klopp កាលគេលេងឲ្យក្លឹប Borussia Dortmund។
យ៉ាងណាកុងត្រារបស់គេនៅសេសសល់ដល់ចុងខែមិថុនា ឆ្នាំ ២០២៣ ឯណោះ អ៊ីចឹងមិនច្បាស់ថា ក្លឹបព្រមអនុញ្ញាតឲ្យគេចេញឬអត់ទេ គ្រាន់ថាតាមដំណឹងគឺ Liverpool ចង់បានខ្សែប្រយុទ្ធវ័យ ៣៣ ឆ្នាំនៅបញ្ចប់រដូវកាល ២០២១/២២។ មើលតាមហាងឆេងថ្លៃខ្លួន ហង្សនឹងត្រូវចាយលើ Lewandowski យ៉ាងហោចណាស់ក៏ ៦០ ទៅ ៧០ លានអឺរ៉ូ។
គួររំឭកថា Lewandowski ជាខ្សែប្រយុទ្ធកណ្តាលដ៏ប្រសព្វមួយ ដូច្នេះបើគេផ្ទេរមក Liverpool គឺអាចឲ្យប្រព័ន្ធប្រយុទ្ធរបស់ហង្សកាន់តែល្អឥតខ្ចោះ ដោយមាន Sadio Mane និង Mohamed Salah អមស្លាបសងខាង ហើយ Lewandowski ជាអ្នកចាំបញ្ចប់ទីនៅកណ្តាល៕
ប្រភព៖ Fichajes
ព័ត៌មានថ្មីៗ
