Ole ថាមិនមែនតែ Ronaldo ទេ ម្នាក់នេះក៏មានឥទ្ធិពលខ្លាំងដែរទៅលើមិត្តរួមក្រុម United
មួយរយៈចុងក្រោយនេះ យើងតែងតែលើកមកជជែកនូវរឿងរ៉ាវអំពី Cristiano Ronaldo មិនចន្លោះថ្ងៃនោះទេ ជាពិសេសក្រោយការបង្ហាញខ្លួននៅប្រកួតដំបូងធ្វើបានយ៉ាងល្អឲ្យក្លឹបថ្មី Man Utd។ បើតាមការបញ្ជាក់ ពីអ្នកចាត់ការលោក Ole Gunnar Solskjaer បានបង្ហើបថា តារាឆ្នើមព័រទុយហ្គាល់ពិតជាបានដើរតួយ៉ាងសំខាន់ ក្នុងការបំផុសទឹកចិត្តនិងណែនាំដល់មិត្តរួមក្រុម ជាពិសេសគឺបណ្តុំយុវជនជំនាន់ក្រោយ។
យ៉ាងណាអ្នកចាត់ការសញ្ជាតិន័រវែសក៏និយាយដល់ឈ្មោះ Raphael Varane ដែលជាខ្សែការពារជោគជ័យ និងឈ្នះពានរង្វាន់ជាច្រើនកាលនៅក្លឹប Real Madrid ថាវត្តមានរបស់គេ ក៏ជះឥទ្ធិពលដល់ក្រុមមិនចាញ់ Ronaldo នោះដែរ។
Solskjaer និយាយមុនត្រៀមបើកការប្រកួតទល់ Young Boys នៅទឹកដីស្វីសដូច្នោះថា៖ "យើងកាន់តែ បន្ថែមគុណភាពដល់ក្រុម ក៏កាន់តែមានភាពជាអ្នកដឹកនាំដែលគ្រប់គ្នាសម្លឹងមកយកគំរូតាម ហើយខ្ញុំគិតថា Raphael [Varane] និង Cristiano [Ronaldo] ការមកដល់របស់គេ គឺពិតជាធ្វើឲ្យគ្រប់គ្នាចាប់អារម្មណ៍ខ្លាំង ព្រោះពួកគេជាអ្នកឈ្នះ ពួកគេបានឈ្នះគ្រប់យ៉ាង ហើយធ្វើឲ្យសមាជិកក្នុងក្រុមទាំងអស់មើលមកពួកគេនិងងឿងឆ្ងល់ថា តើអាចឈរដល់កម្រិតខ្ពស់បែបនេះបានដោយរបៀបណា"។
លោកបន្ថែមថា៖ "ដូច្នេះវាមិនមែនតែល្អសម្រាប់ទាំងអស់គ្នាទេ ហើយក៏មានការប្រកួតប្រជែងបន្ថែមទៀតដែរ ជាក់ស្តែងខ្ញុំឃើញ Lingard ធ្វើបានល្អ Anthony [Martial] ធ្វើបានល្អ ពោលពិតជាធ្វើឲ្យខ្ញុំរីករាយជាខ្លាំង"៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
