គម្លាតគ្រាប់បាល់នៅ PL រយៈពេលយូរបំផុត ឈ្មោះ Ronaldo នៅចាញ់តែម្នាក់នេះគត់
Cristiano Ronaldo បានសម្រេច ២ គ្រាប់ម្នាក់ឯងនៅការប្រកួតទល់ Newcastle United សម្រាប់ការប្រកួតជុំទី ៤ ឲ្យក្លឹបថ្មី Man Utd កាលពីយប់ថ្ងៃសៅរ៍កន្លងទៅ។ វាជាគ្រាប់បាល់ដំបូងនៅ Premier League សម្រាប់ CR7 បើយើងរាប់ចាប់តាំងពីពេលដែលលោកចាកចេញនៅឆ្នាំ ២០០៩។
ជាការពិត តារាឆ្នើមរបស់ក្លឹបបិសាចក្រហម រកបាន ១១៨ គ្រាប់មុនផ្ទេរចេញទៅ Real Madrid ហើយគ្រាប់បាល់ចុងក្រោយរបស់ខ្លួននៅ United សារនោះ គឺទល់ Man City នាខែឧសភា ឆ្នាំ ២០០៩។ គិតមកទល់ពេលចុងក្រោយទល់ Newcastle United គឺមានគម្លាត ១២ ឆ្នាំ និង ១២៤ ថ្ងៃហើយ។
វាបានក្លាយជាកំណត់ត្រាថ្មីមួយផងដែរ សម្រាប់ខ្សែប្រយុទ្ធព័រទុយហ្គាល់ ក្នុងនាមជាកីឡាករបង្កើតគម្លាតគ្រាប់បាល់នៅ Premier League រយៈពេលយូរបំផុតលំដាប់ទី ២ ដោយនៅចាញ់តែអតីតជើងចាស់មួយរូបប៉ុណ្ណោះ នោះគឺ Matt Jackson។
អតីតកីឡាករអង់គ្លេស ធ្លាប់សម្រេចគ្រាប់បាល់នៅការលេងឲ្យ Everton ក្នុងក្របខ័ណ្ឌ Premier League នាខែឧសភា ឆ្នាំ ១៩៩៣ ហើយរហូតដល់ខែវិច្ឆិកា ឆ្នាំ ២០០៦ ជាមួយការលេងឲ្យក្លឹប Wigan Athletic ពេលនោះទើបលោកអាចរកបានគ្រាប់បាល់សារជាថ្មី ពោលវាមានគម្លាត ១៣ ឆ្នាំ និង ១៨៧ ថ្ងៃ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
