ចៃដន្យម្ល៉េះ! Kane និង Cavai យល់ឃើញខ្សែការពាររូបនេះ ពិបាកតតាំងដូចគ្នា
តំណែងជាខ្សែប្រយុទ្ធ មុនឆ្លងកាត់ដល់ការបញ្ចប់ទីបាន គឺត្រូវឆ្លងកាត់ប្រព័ន្ធការពារនៃក្រុមគូប្រជែងនីមួយៗសិន ហើយកីឡាករលេងប្រយុទ្ធខ្លះ បានភ្លក់រសជាតិតតាំងកីឡាករលេងតំណែងការពារកំពូលៗជាច្រើនរាប់ភ្លេច។
ក្រឡេកមក Edinson Cavani ជាកីឡាកររបស់ក្លឹប Man Utd និង Harry Kane របស់ក្លឹប Tottenham Hotspur ឯណេះវិញ ពួកគេបានបង្ហាញការយល់ឃើញដូចគ្នា អំពីខ្សែការពារមួយរូប ដែលគិតថា ពិបាកនឹងតតាំងបំផុតលើទីលាន ហើយនោះគឺជា Giorgio Chiellini។
សម្រាប់ Cavani ធ្លាប់និយាយប្រាប់គេហទំព័រផ្លូវការក្លឹបបិសាចក្រហមដូច្នោះថា៖ "ខ្ញុំលេងប៉ះខ្សែការពារខ្លាំងៗច្រើនហើយ តែខ្ញុំតែងតែនិយាយហើយមកទល់ពេលនេះ អ្នកពិបាកនឹងតតាំងបំផុតគឺជា Giorgio Chiellini"។
ចំណែកឯ Kane ធ្លាប់និយាយនៅឆ្នាំ ២០១៨ ថា៖ "ខ្ញុំត្រូវបានគេសួរច្រើនសារហើយអំពីខ្សែការពារដែលគិតថាពិបាកនឹងតតាំងបំផុត ដោយខ្ញុំក៏តែងតែនិយាយដែរថាជា Chiellini ហើយខ្ញុំធ្លាប់បានតតាំងគេប៉ុន្មានលើកដែរ"។
ជាការពិតការប៉ះគ្នាជាមួយ Chiellini សម្រាប់ Cavani និង Kane ក្តី បើការប្រជែងនៅក្លឹបគឺអាចថាមានតិចតួចណាស់ ភាគច្រើនគឺនៅជម្រើសជាតិដែលជាការប៉ះគ្នារវាងអ៊ុយរុយហ្គាយ-អ៊ីតាលី និងអង់គ្លេស-អ៊ីតាលីជាដើម៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
