មិនមែន Bruno តែ Berbatov ថាម្នាក់នេះចំណេញជាងគេ ពីការមកដល់របស់ Ronaldo
អតីតខ្សែប្រយុទ្ធ Man Utd គឺ Dimitar Berbatov បានបង្ហាញការយល់ឃើញមួយចំនួន ពាក់ព័ន្ធនឹងការវិលត្រលប់មកវិញរបស់ Cristiano Ronaldo ហើយជឿថាសារនេះ មានឥទ្ធិពលវិជ្ជមានជាច្រើនចំណុច ដែលនឹងក្លាយជាផលល្អសម្រាប់ក្លឹបម្ចាស់ដី Old Trafford។
១ ក្នុងចំណោមផលវិជ្ជមានជាច្រើន សម្រាប់ Berbatov ដែលជាអតីតកីឡាករ United ជំនាន់ឆ្នាំ ២០០៩ ដល់ ២០១៣ បាននិយាយថា វត្តមានរបស់ Ronaldo គឺនឹងជាប្រយោជន៍ដ៏ធំបំផុត សម្រាប់យុវជនឆ្នើម Mason Greenwood ព្រោះគេអាចទទួលបានឱកាសក្រេបជញ្ជក់នៅបទពិសោធន៍និងបានឃើញដោយផ្ទាល់ នៅការចែករំលែកពីរៀមចម្បងខាងលើ។
ប្រាប់សារព័ត៌មានកាលពីពេលកន្លងទៅ លោក Berbatov និយាយ៖ "Cristiano នឹងជួយជ្រោមជ្រែងដល់កីឡាករជាច្រើនកំឡុងពេលហ្វឹកហាត់បែបស្តង់ដាររបស់គេ ហើយអ្នកទទួលបានប្រយោជន៍ធំបំផុតគឺ Mason Greenwood"។
លោកបន្ថែមថា៖ "ដោយសារ Greenwood គេជាកីឡាករដែលពូកែខាងបញ្ចប់ទីស្រាប់ គេចូលចិត្តស៊ុតបាល់ពីចំហៀងដូច Ronaldo ហើយរបៀបស៊ុតរបស់គេគឺមើលទៅដូចគ្នា ដូច្នេះខ្ញុំសង្ឃឹមថាគេចេះចាប់យកឱកាសនេះ ហ៊ានសួរនាំសុំយោបល់ពីរៀមចម្បង តែប្រសិនគេមានការអៀនខ្មាស គេអាចចាំសង្កេតមើលដោយខ្លួនឯងផ្ទាល់ក៏បាន មើលការរៀបចំខ្លួន មើលរបបអាហារដែល Ronaldo ទទួលទាន ជារួមខ្ញុំសង្ឃឹមថាគេចេះចាប់យកឱកាសនេះ ហើយហ៊ានសួរនៅអ្វីដែលគេចង់ដឹងទៅចុះ"៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
