Messi និង Ronaldo នៅសល់កំណត់ត្រាធំៗណាខ្លះ ដែលកំពុងប្រជែងគ្នា?
ទាំង Lionel Messi និង Cristiano Ronaldo បានផ្ទេរមកកាន់ក្លឹបថ្មី នៅរដូវកាល ២០២១/២២ ដោយមួយនៅលីគកំពូលបារាំងជាមួយ PSG និងមួយផ្សេងទៀតនៅលីគកំពូលអង់គ្លេសជាមួយ Man Utd។
គ្រប់គ្នាកំពុងរង់ចាំមើល ថាតារាឆ្នើមទាំងពីរ នឹងអាចបន្តភាពលេចធ្លោរបស់ខ្លួនបានទៀតដែរឬទេ ហើយនៅការប្រជែងកំណត់ត្រាមួយចំនួន តើនរណានឹងមានប្រៀបជាងនរណានៅរយៈពេលបន្ទាប់? Knongsrok សូមបង្ហាញកំណត់ត្រាប្រកៀកប្រកិតគួរឲ្យចាប់អារម្មណ៍មួយចំនួនរបស់អ្នកទាំងពីរដូចខាងក្រោម៖
សម្រាប់ Ronaldo នៅកម្រិតជម្រើសជាតិ គឺលោកឈរឈ្មោះដាច់គេហើយ ដោយមាន ១១១ គ្រាប់ ធៀបនឹង Messi គឺនៅឆ្ងាយ ដោយកីឡាករអាហ្សង់ទីនទើបរកបាន ៧៦ គ្រាប់ប៉ុណ្ណោះ ពោលត្រូវការ ២ គ្រាប់ដើម្បីបំបែកនិងនាំមុខកំណត់ត្រារបស់ Pele ក្លាយខ្លួនជាកីឡាកររកបានគ្រាប់បាល់ច្រើនបំផុតនៅប៉ែកអាមេរិកឡាទីន។
ចំណែកឯនៅក្លឹប Man Utd សម្រាប់ការមកដល់របស់ Ronaldo (១៧៥ លើក) គឺគេត្រូវការការបង្ហាញខ្លួន Champions League ២ ប្រកួតបន្ថែមទៀត ដើម្បីតាមស្មើ Iker Casillas នាមកីឡាករបង្ហាញខ្លួននៅ UCL ច្រើនបំផុតមាន ១៧៧ លើក ធៀបនឹង Messi គឺមាន ១៤៩ លើក។
ទៅមើលពានរង្វាន់ឯណោះវិញ គឺ Messi មានប្រៀបជាងសម្រាប់ពានឯកត្តជន Ballon d'Or ដែលគេឈ្នះ ៦ លើក ហើយ Ronaldo ឈ្នះទើបតែបាន ៥ លើក ផ្ទុយទៅវិញបើនៅពាន UCL គឺអតីតខ្សែប្រយុទ្ធ Real ធ្វើបាន ៥ លើក តែអតីតកីឡាករ Barca ធ្វើបាន ៤ លើក។
ចុងក្រោយគឺគ្រាប់បាល់ការលេងឲ្យក្លឹប Ronaldo មាន ៦៧៤ គ្រាប់ នាំមុខ Messi ចំនួន ២ គ្រាប់។ តួលេខនេះ នឹងមានការប្រជែងគ្នាខ្លាំង នៅពេលរដូវកាលថ្មីចាប់ផ្តើមមានពួកគេចូលលេងទៀងទាត់៕
ប្រភព បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
