Raul ថាក្របខ័ណ្ឌ La Liga ត្រូវការកីឡាករប្រភេទនេះ ក្រោយ Messi/Ronaldo ចេញទៅ
អតីតកីឡាករនៅក្លឹប Real Madrid គឺ Raul Albiol បានបង្ហាញការយល់ឃើញថា អធិរាជសគួរតែជំរុញបន្ថែមលើការចុះហត្ថលេខាយក Kylian Mbappe ពីក្លឹប Paris Saint-Germain ព្រោះគេជាគ្រាប់ពេជ្រដ៏សក្តិសមសម្រាប់ការផ្ទេរមកលីគកំពូលអេស្ប៉ាញ ក្រោយពីលីគមួយនេះបាត់បង់វត្តមានតារាឆ្នើម Cristiano Ronaldo និង Lionel Messi។
ពេលនេះ M10 កំពុងស្ថិតនៅលីគបារាំង ខណៈ CR7 ស្ថិតនៅលីគអង់គ្លេស ហើយនៅ La Liga ពុំមានតារាលេចធ្លោណានោះទេ ថាអស់ធំបើយើងរាប់តាមបណ្តាក្លឹប អាចឈ្មោះ Benzema និង Suarez ជាដើម ប៉ុន្តែពួកគេពុំមែនជាអ្វីដែលអ្នកគាំទ្រចង់ឃើញបំផុតនោះឡើយ។
ជជែកប្រាប់សារព័ត៌មាន AS អតីតខ្សែការពារនៅ Madrid និយាយ៖ "ខ្ញុំពិតជាចង់ឃើញវត្តមាន Mbappe មកកាន់លីគមួយនេះ គេជាកីឡាករដ៏ល្អម្នាក់ លំដាប់ពិភពលោក ហើយខ្ញុំគិតថា ប្រភេទកីឡាករដូចជាគេហ្នឹងហើយ ដែលយើងត្រូវការមកកាន់លីគកំពូលអេស្ប៉ាញ ក្រោយពីការចាកចេញរបស់ Cristiano និង Messi ពោលវាពិតជាសំខាន់ប្រសិនគេមក"។
លោកសង្កត់ធ្ងន់៖ "ហើយវាកាន់តែសំខាន់សម្រាប់ក្លឹប Real Madrid ជាក្រុមដែលខ្ញុំធ្លាប់បម្រើអាជីពនៅទីនោះ"។ បញ្ជាក់ថាបន្តិចនេះជា Raul លេងខ្សែការពារ មិនមែន Raul Gonzalez នោះទេ ដោយគេបានចាយពេលនៅ Real Madrid រយៈពេល ៤ ឆ្នាំ ចន្លោះឆ្នាំ ២០០៩ ដល់ ២០១៣ ហើយសព្វថ្ងៃកំពុងប្រកបអាជីពឲ្យក្លឹប Villarreal៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
