បានលេងតិចពេក កីឡាករ Arsenal មួយរូប បង្ហោះសារសុំក្លឹបចាកចេញលាយឡំទឹកភ្នែក
ក្លឹបកាំភ្លើងធំ Arsenal នៅប៉ុន្មានប្រកួតចុងក្រោយហាក់កាន់តែពិបាកមើល ហើយស្ថានភាពផ្ទៃក្នុងក្លឹបក៏ទំនងជាមានបញ្ហារកាំរកូសមួយចំនួនផងដែរ។ ជាក់ស្តែងមានកីឡាករជាច្រើនចង់ចាកចេញ ខ្លះដោយសារមិនសូវមានពេលវេលាបង្ហាញខ្លួន ខ្លះមើលឃើញអនាគតមិនអាចអភិវឌ្ឍតទៅមុខ។
យ៉ាងណាមកមើលយុវជនវ័យ ២៤ ឆ្នាំ គឺ Ainsley Maitland-Niles ក៏បានបង្ហោះសារសុំក្លឹបចាកចេញផងដែរ ក្រោយពីខ្សត់ឱកាសបង្ហាញខ្លួនលើទីលាន។ នៅរដូវកាលថ្មីខ្សែបម្រើស្លាបស្តាំ ទើបមានឱកាសឈរជើង ២ ប្រកួតគត់ ហើយជាកីឡាករបម្រុងទៀត ដោយគិតជានាទី បានមិនដល់ ៥០ នាទីផង។
សរសេរលើ Instagram នៅរសៀលថ្ងៃចន្ទ Maitland-Niles បានបង្ហោះជាសាធារណៈបែបនេះថា៖ "អ្វីដែលខ្ញុំចង់បាន គឺចង់ទៅកន្លែងដែលគេត្រូវការខ្ញុំ កន្លែងដែលខ្ញុំអាចលេងបាន"។ ជាសារដែលលាយឡំនឹង Emoji សម្រក់ទឹកភ្នែកហើយ Mention ក្លឹប Arsenal ចំៗតែម្តង។
យើងមិនទាន់ច្បាស់នោះទេ ថា Arsenal សម្រេចបែបណា? ស្របពេលដែលសុពលភាពកុងត្រារបស់គេត្រូវផុតនៅចុងខែមិថុនា ឆ្នាំ ២០២៣ ហើយតាមហាងឆេងថ្លៃខ្លួនគេអាចជាថ្លៃប្រហែល ១៦ លានអឺរ៉ូ។ តាមចចាមអារ៉ាម ក្លឹប Everton ក៏មើលឃើញកីឡាករអង់គ្លេសរូបនេះផងដែរ តែកាលបរិច្ឆេទបិទទីផ្សារដោះដូរ នៅសល់ពេលខ្លីមិនដល់ ២៤ ម៉ោង៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
