មេធំ Dortmund ឆ្លើយតបមួយម៉ាត់យ៉ាងខ្លី រឿងគេថា PSG តាមយក Haaland ទៅជំនួស Mbappe
ក្លឹប Borussia Dortmund ប៉ុន្មានថ្ងៃចុងក្រោយ មានដំណឹងថាអាចជានឹងលក់ចេញ Erling Haaland មុនបិទទីផ្សារដោះដូរនៅចុងខែសីហា ទៅឲ្យភាគីក្លឹបបារាំង Paris Saint-Germain ដែលពួកគេត្រៀមបាត់បង់ Kylian Mbappe។
យ៉ាងណាមកទល់ពេលនេះ អនាគតរបស់ Mbappe ក៏មិនទាន់ប្រាកដប្រជា ១០០ ភាគរយនោះដែរ តែកាលពីយប់មិញគេបានបង្ហាញខ្លួន និងរកបានគ្រាប់បាល់ជាធម្មតាឲ្យក្លឹបអាណាព្យាបាលបារាំង។ ទៅមើលការបកស្រាយរបស់នាយកផ្នែកបច្ចេកទេសលោក Michael Zorc របស់ Dortmund បានសង្កត់ធ្ងន់ថា មិនខ្វល់រឿង Mbappe អីនោះទេ សំខាន់ក្លឹបរបស់ខ្លួនមានគោលការណ៍ច្បាស់ហើយគឺមិនលក់ Haaland ដាច់ខាត។
ឆ្លើយតបទៅនឹងចចាមអារ៉ាមដែលគេថា PSG អាចចាយលុយ ១៧១ លានផោន ថ្ពក់យក Haaland នៅថ្ងៃអង្គារស្អែកនេះ ក៏ត្រូវបាន Zorc ប្រាប់មកវិញ៖ "យើងគឺជាក្លឹបបាល់ទាត់ យើងមិនមែនជាធនាគារដើម្បីតែទទួលប្រាក់នោះទេ យើងដាក់ផែនការណ៍បែបណាគឺច្បាស់លាស់បែបហ្នឹងហើយ គ្មានការផ្លាស់ប្តូរទេ"។
លោកសង្កត់ធ្ងន់៖ "ខ្ញុំគិតថាយើងមានតែត្រូវប្រឈមនឹងចចាមអារ៉ាមដែលកំពុងសាយភាយរយៈពេល ២ ថ្ងៃចុងក្រោយនេះទៀត តែច្បាស់សំខាន់លើយើង ពីផែនការណ៍ដែលត្រូវធ្វើ ដោយមិនចាំបាច់ខ្វល់ខ្វាយពីរឿងដទៃទៀតឡើយ"៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
