អាប់ដែតថ្មី! ប្រាក់ពលកម្ម Ronaldo ខ្ពស់ដាច់គេនៅ United តែមិនលើស De Bruyne
របាយការណ៍កាលពីថ្ងៃម្សិលមិញយើងទទួលបានដំណឹងមកថា Cristiano Ronaldo នឹងទទួលបានថ្លៃពលកម្មដល់កន្លះលានផោនក្នុងមួយសប្តាហ៍ ដែលមានន័យថា រុញឲ្យគេក្លាយជាកីឡាករស៊ីថ្លៃបំផុតនៅ Premier League ដោយនាំមុខទាំង Kevin de Bruyne របស់ Man City ថែមទៀត។
យ៉ាងណានៅរបាយការណ៍ថ្មីចុះផ្សាយនាព្រឹកថ្ងៃអាទិត្យនេះ ប្រភពពី Daily Mail ឲ្យដឹងថា កីឡាករព័រទុយហ្គាល់នឹងមិនអាចរកបានដល់ ៥០០ ០០០ ផោន/សប្ដាហ៍នោះទេ ពោលបានត្រឹមតែជាកីឡាករស៊ីថ្លៃបំផុតនៅ Man Utd ប៉ុណ្ណោះ ដែល ១ ឆ្នាំបាន ២០ លានផោន ស្មើនឹង ៣៨៥ ០០០ ផោន/សប្តាហ៍។
ទំហំនេះខ្ពស់ជាង David de Gea ទទួលបាន ៣៧៥ ០០០ ផោន/សប្តាហ៍ ប៉ុន្តែធៀបនឹង De Bruyne របស់ក្លឹប Man City គឺឈរនៅកម្រិតស្មើគ្នាប៉ុណ្ណោះ។ ម្ចាស់អាវលេខ ៧ ទំនងជាទទួលបានកុងត្រារយៈពេល ២ ឆ្នាំ ដល់ចុងខែមិថុនា ឆ្នាំ ២០២៣។
គួរបញ្ជាក់ដែរថា ម្ចាស់ពាន Ballon d'Or ៥ សម័យកាល ទំនងជាបង្ហាញខ្លួនលើទីលានឲ្យ United ជាផ្លូវការទៅក្នុងការប្រកួតទល់ Newcastle នាថ្ងៃទី ១១ កញ្ញា។ តារាឆ្នើមវ័យ ៣៦ ឆ្នាំ ក៏ធ្លាប់ចាយពេលឲ្យបិសាចកាលពីចន្លោះឆ្នាំ ២០០៣ ដល់ ២០០៩ មួយសារហើយដែរ កាលនោះគេបង្ហាញខ្លួន ២៩២ ប្រកួត រកបាន ១១៨ គ្រាប់៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
