ទោះ Cavani ព្រមឲ្យអាវលេខ ៧ ក៏ Ronaldo យកមិនបានដែរ ព្រោះដោយសារច្បាប់មួយនេះ
Cristiano Ronaldo ថាមិនត្រូវអាចនឹងប្រើប្រាស់លេខអាវដល់ទៅ ២ ផ្សេងគ្នាឲ្យក្លឹប Man Utd រដូវកាលនេះ ប្រសិនណាជាច្បាប់នៅក្របខ័ណ្ឌ Premier League ពុំអនុញ្ញាតឲ្យលោកទទួលយកអាវលេខ ៧ ពី Edinson Cavani។
តាមដំណឹងគឺកីឡាករអ៊ុយរុយហ្គាយព្រមប្រគល់អាវលេខ ៧ មកឲ្យចំណូលថ្មី Ronaldo ហើយ តែសំខាន់ត្រង់ថាច្បាប់នៅ Premier Leauge មានការលើកលែងឲ្យឬអត់? នោះក៏ដោយសារតែច្បាប់នៃ Section M បានចែងថា កីឡាករទាំងអស់នឹងមិនអនុញ្ញាតឲ្យផ្លាស់ប្តូរលេខអាវបាននោះទេ ក្រោយពីក្លឹបបញ្ជូនបញ្ជីឈ្មោះកីឡាករឡើងមកក្របខ័ណ្ឌមុនបើករដូវកាលថ្មីហើយ។ វាអាចផ្លាស់ប្តូរទៅបាន តែក្នុងលក្ខខណ្ឌដែលម្ចាស់លេខអាវមួយនោះ ចាកចេញពីក្លឹបមុនបិទទីផ្សារដោះដូរ ដូច្នេះលេខអាវអាចបង្វែរឈ្មោះកីឡាករពីមួយទៅមួយបាន។
ដូច្នេះមានន័យថា លុះត្រាតែ Cavani ចែកផ្លូវពីក្លឹប ដើម្បីឲ្យលេខ ៧ ទំនេរសិន ទើប Ronaldo អាចចូលមកគ្រងលេខនេះជំនួសបាន។ ក្នុងករណីមួយផ្សេងទៀតគឺក្លឹប Man Utd អាចដាក់សំណើពិសេសទៅកាន់ក្របខ័ណ្ឌ Premier League បាន អំពីការដោះដូរលេខអាវ ប៉ុន្តែកន្លងមកមិនធ្លាប់មានការសម្រេចពីក្របខ័ណ្ឌនោះឡើយ។
យ៉ាងណាវានៅមានករណីផ្សេង ដែល Ronaldo អាចប្រើប្រាស់អាវលេខ ៧ បាន តែមិនមែននៅ Premier League មានន័យថា នៅក្របខ័ណ្ឌដទៃដូចជា Champions League គឺលោកអាចពាក់អាវលេខ ៧ តែនៅ United ត្រូវប្រើលេខផ្សេងដែលទំនេរ ហើយមិនជាន់នឹងកីឡាករដែលមានឈ្មោះក្នុងបញ្ជី។ វាស្រដៀងករណីរបស់ Henrikh Mkhitaryan ដែលបានពាក់អាវលេខ ៧ នៅ PL ហើយលេខ ៧៧ នៅ Europa League កាលគេនៅលេងឲ្យក្លឹប Arsenal៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
