មានទឹកមាត់លេបហើយ Arsenal ប៉ះគ្នាល្ងាចថ្ងៃសៅរ៍នេះ City គ្មានជើងសំខាន់ម្នាក់នេះទេ
នៅវេលាម៉ោង ១៨:៣០ នាទីល្ងាច ថ្ងៃសៅរ៍ ទី ២៨ សីហា ក្រុមម្ចាស់ផ្ទះ Man City នឹងបើកកីឡដ្ឋាន Etihad ស្វាគមន៍ក្រុមភ្ញៀវ Arsenal សម្រាប់ប្រកួតជុំទី ៣ នៃក្របខ័ណ្ឌ Premier League។ កន្លងទៅកាំភ្លើងធំទើបតែសម្ញែងសាច់ដុំយកឈ្នះការប្រកួត ៦-០ នៅ EFL ដែលនេះហាក់ធ្វើឲ្យក្រុមលោក Pep Guardiola រាងមានការញញើតបន្តិចដែរ។
យើងឃើញថាកីឡាករសំខាន់ៗរបស់កាំភ្លើងធំ ដូចជា P.E Aubameyang, Alexandre Lacazette និង Martin Odegaard គឺជុំជើងគ្នាត្រលប់មកវិញអស់ហើយ ខណៈដែល Man City បែរជាត្រូវបាត់បង់តារាឆ្នើមដ៏សំខាន់នៅប្រព័ន្ធកណ្តាលទៅវិញនោះគឺ Kevin de Bruyne។
តាមការបញ្ជាក់របស់អ្នកចាត់ការជម្រើសជាតិបែលហ្សិក លោក Roberto Martinez និយាយបែបនេះថា៖ "Kevin នឹងមិនមានឈ្មោះក្នុងការប្រកួតទល់ Arsenal នោះទេ ដោយអ្នកបានដឹងហើយដ្បិតគេមានពេលវេលាបង្ហាញខ្លួនកាលប៉ះ Tottenham តែក្រោយប្រកួតនោះគេនៅទទួលរងការឈឺចាប់របួសចាស់"។
លោកសង្កត់ធ្ងន់៖ "គេនឹងមិនបានលេងនៅចុងសប្តាហ៍នេះទេ ហើយមានតែរង់ចាំមើលស្ថានភាពរបួសគេតទៅទៀត ដោយតាមពិតទៅ គេខិតខំខ្លាំងណាស់នៅខាងក្រោយទីលាន ដើម្បីជួយឲ្យរាងកាយត្រលប់មកសភាពដើមវិញ តែពេលនេះគេមិនទាន់ត្រៀមខ្លួនបាន ១០០ ភាគរយនោះឡើយ"៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
