ក្តៅទាំងយប់! លឺថា Ronaldo សម្រេចការផ្ទេរទៅក្លឹប Man City ហើយ
បណ្តាញសង្គម Twitter កំពុងផ្ទុះដូចទឹកបាក់ទំនប់នៅយប់ថ្ងៃព្រហស្បតិ៍ ទី ២៦ សីហានេះ បន្ទាប់ពីអ្នកកាសែតសញ្ជាតិព័រទុយហ្គាល់ លោក Goncalo Lopes បញ្ជាក់ច្បាស់ៗថា ការចរចាលើការនាំយក Cristiano Ronaldo ចេញពី Juventus ទៅកាន់ក្លឹប Manchester City គឺឈានដល់ការសម្រេចហើយ។
សូម្បីតែទំព័របាល់ទាត់ Bleacher Report ដែលមាន Follower ជិត ១០ លាននាក់លើ Instagram ក៏បានសម្រង់ព័ត៌មានខាងលើមកបន្តចែកចាយផងដែរ នាំឲ្យយើងកាន់តែជឿជាក់ថា វាជាព័ត៌មានពិត ត្រៀមនឹងប្រកាសផ្លូវការនៅពេលដ៏ខ្លីខាងមុខ។
វាជារឿងដ៏ភ្ញាក់ផ្អើលមួយ ព្រោះដូចយើងបានដឹងស្រាប់ហើយ Ronaldo ជាអតីតកីឡាករនៅបិសាចក្រហម Man Utd ហើយលោកបែរជាជ្រើសរើសការផ្ទេរទៅក្លឹបគូប្រជែង Man City ដោយគ្មានការស្ទាក់ស្ទើរ។
យើងមិនច្បាស់នោះទេថាការសម្រេចចិត្តនេះធ្វើឡើងក្នុងគោលបំណងអ្វី តែបើយើងមើលជាក់ស្តែងទៅរយៈពេល ៣ ឆ្នាំ ដែល CR7 ចាយពេលនៅ Turin គឺលោកមិនទទួលបានជោគជ័យដូចការចង់បាននោះឡើយ តួយ៉ាងដូចពាន Champions League និងពានឯកត្តជន Ballon d'Or ដែលខានស្គាល់រសជាតិចាប់តាំងពីការដើរចេញពីក្លឹប Real Madrid។
រំឭកថាសុពលភាពកុងត្រារបស់ Ronaldo នៅក្លឹបសេះបង្កង់ ត្រូវផុតនៅចុងខែមិថុនា ឆ្នាំក្រោយ ២០២២ ហើយបើតាមដំណឹង City ត្រូវចាយលើតម្លៃផ្ទេរចេញ ២៥ លានផោនប្រគល់ទៅក្លឹបអាណាព្យាបាល។ រីឯតម្លៃពលកម្មយើងទទួលបានព្រឹកនេះ គឺមេឃខៀវផ្តល់ឲ្យ ២៣០ ០០០ ផោន/សប្តាហ៍ លើសុពលភាពកុងត្រារយៈពេល ២ ឆ្នាំ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
