Mendes រត់ការចង់យក Ronaldo ទៅ Man City ហើយដោះដូរកីឡាករម្នាក់ជាថ្នូរត្រលប់មក Juve
ទីភ្នាក់ងាររត់ការលោក Jorge Mendes ហាក់កំពុងសកម្មខ្លាំងនៅរយៈពេលចុងក្រោយនៃទីផ្សារដោះដូររដូវក្តៅ ដោយលឺថា លោកមិនទាន់រកបានក្លឹបសមរម្យណាមួយ ដែលព្រមទទួលយក Cristiano Ronaldo នោះទេ ទាំងដែលកីឡាករហាក់មានចិត្តចង់ចែកផ្លូវឲ្យបានឆាប់។
កាលបរិច្ឆេទទីផ្សារដោះដូរសេសសល់តែរយៈពេល ៦ ថ្ងៃទៀតប៉ុណ្ណោះ ខណៈដែលសុពលភាពកុងត្រារបស់ CR7 បើមិនបន្តនៅពេលខាងមុខ នោះនឹងផុតនៅចុងខែមិថុនា ឆ្នាំ ២០២២ ហើយក្លាយជាកីឡាករឥតតម្លៃខ្លួន។
បើតាមសារព័ត៌មាន L'Equipe ចុះផ្សាយថា លោក Mendes បានដាក់សំណើទៅកាន់ Man City ដោយចង់ដោះដូរ Bernardo Silva មក Juventus ហើយជំនួសការផ្ទេរ Ronaldo ទៅកាន់ក្លឹបអង់គ្លេសវិញ តែចម្លើយចេញពីភាគី City គឺពួកគេមិនយល់ព្រមនោះទេ។ ក្នុងសំណើនោះក្លឹបសេះបង្កង់កំណត់តម្លៃផ្ទេររបស់ Ronaldo គឺប្រហែល ២៥ លានអឺរ៉ូ ដូច្នេះមានន័យថា ក្លឹបត្រូវចាយតែជាង ៣០-៤០ លានអឺរ៉ូទៀតប៉ុណ្ណោះ ដើម្បីប៉ះប៉ូវលើការនាំយក Silva។
តាមពិតបើយើងស៊ីជម្រៅទៅបញ្ហានៅពីក្រោយនោះ ទី ១) អាចថា City ចង់បាន Harry Kane ដែលជាគោលដៅអាទិភាព ទី ២) City មិនចង់ចំណាយលើថ្លៃពលកម្មក្រាស់ក្រែល ដូចយើងដឹងស្រាប់ហើយសព្វថ្ងៃនៅ Juventus មួយសប្តាហ៍ក្លឹបចាយលើកីឡាករព័រទុយហ្គាល់ដល់ទៅ ៥១០ ០០០ ផោន៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
