ក្តៅ! Ronaldo នឹងទៅលេងជាមួយ Messi នៅ PSG ប្រសិនក្លឹប Real ព្រមជួយរឿងនេះ
ដំណឹងចុងក្រោយកាន់តែក្តៅគគុក ពាក់ព័ន្ធនឹងការចាកចេញរបស់កីឡាករព័រទុយហ្គាល់ Cristiano Ronaldo ដែលលឺថាសាមីខ្លួន កំពុងរំអុកចង់ចែកផ្លូវពីក្លឹប Juventus ឲ្យបានមុនបិទទីផ្សារដោះដូរនាថ្ងៃទី ៣១ សីហា។
ភ្នាក់ងាររត់ការលោក Jorge Mendes កំពុងមានសម្ពាធ ក្រោយមិនទាន់រកបានក្លឹបសមប្រកបណាមួយឲ្យតារាឆ្នើមពាក់អាវលេខ ៧ ដ្បិតអីចចាមអារ៉ាមកន្លងមកលឺថា មានតាំងពី Man City, Man Utd និង PSG ដែលចាប់អារម្មណ៍ចង់បាន។
យ៉ាងណាបើតាមការចុះផ្សាយរបស់ AS បានឲ្យដឹងថា Ronaldo អាចនឹងមានឱកាសទៅសហការរួមគ្នាជាមួយអតីតគូប្រជែង Leo Messi នៅក្លឹបសេដ្ឋីបារាំង ប្រសិនណាក្លឹបបារាំង Paris Saint-Germain អាចលក់ Kylian Mbappe ឲ្យទៅក្លឹប Real Madrid។
ការចុះផ្សាយនេះកើតឡើងក្រោយ កីឡាករបារាំង Mbappe បដិសេធការផ្តល់ជូនកុងត្រាថ្មីរយៈពេល ៥ ឆ្នាំពីក្លឹប PSG ដូច្នេះក្លឹបច្បាស់ណាស់នឹងលក់គេចេញមុនបិទទីផ្សារដោះដូរ ព្រោះអីមិនចង់រក្សាទុក ដោយមិនទទួលបានតម្លៃខ្លួនឡើយ។ សរុបមកគឺ ទាមទារឲ្យក្លឹប Real Madrid ជាអ្នកជួយលើរឿងនេះ លុះត្រាតែពួកគេហ៊ានឲ្យតម្លៃរាងកល់បន្តិច ដើម្បីទាក់ចិត្ត PSG ឲ្យព្រមវ៉ៃចេញកីឡាករវ័យ ២២ ឆ្នាំ នោះការចាប់ដៃជាធ្លុងមួយរវាង Ronaldo&Messi ច្បាស់ណាស់ប្រាកដជាអាចកើតឡើង។
រំឭកដែរថា Mbappe ត្រូវចាកចេញជាចាំបាច់ ប្រសិន PSG ពិតចង់បាន Ronaldo ព្រោះតម្លៃពលកម្មដែលក្លឹបចំណាយពេលនេះ គឺកៀកបន្ទាត់ក្រហមហើយ។ Mbappe ស៊ីថ្លៃជាង ៣៦០ ០០០ អឺរ៉ូ/សប្តាហ៍ ដែលទំហំនេះអាចប៉ះប៉ូវផ្តល់មកឲ្យ Ronaldo វិញបាន ប្រសិនការចរចាអាចសម្រេចដូចការគ្រោងទុក៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
