[ផ្លូវការ] ខ្សែប្រយុទ្ធស្លាបរបស់ Liverpool ម្នាក់ សម្រេចផ្ទេរទៅក្លឹបនៅលីគកំពូលបារាំង
រយៈពេល ១ សប្ដាហ៍ចុងក្រោយនៃកាលបរិច្ឆេទបិទទីផ្សារដោះដូររដូវក្តៅ សម្រាប់ក្លឹបអង់គ្លេស Liverpool នៅតែសកម្មដដែលលើការចរចា ជាក់ស្តែងថ្មីៗនេះទើបសម្រេចបានការវ៉ៃចេញខ្សែប្រយុទ្ធស្លាប Xherdan Shaqiri ឲ្យទៅក្លឹប Lyon នៅឯលីគកំពូលបារាំង Ligue 1។
បុរសវ័យ ២៩ ឆ្នាំ អាចលេងបានទាំងតំណែងបម្រើ និងប្រយុទ្ធស្លាប ហើយកាលពីឆ្នាំ ២០១៨ ត្រូវបានក្លឹប Liverpool ទិញចេញពី Stoke City ជាមួយតម្លៃ ១៤,៧ លានអឺរ៉ូ រីឯការផ្ទេរមក Lyon សារនេះ គឺលក់បានត្រឹមតម្លៃ ៦ លានអឺរ៉ូប៉ុណ្ណោះ។ កិច្ចព្រមព្រៀងជាមួយក្លឹប Lyon សម្រាប់ Shaqiri បានចុះហត្ថលេខាលើកុងត្រាដល់ចុងខែមិថុនា ឆ្នាំ ២០២៣។
តាមរយៈសេចក្ដីថ្លែងការណ៍របស់ Liverpool ចុះផ្សាយថា៖ "គ្រប់គ្នានៅ Liverpool FC ក៏ចង់អរគុណដល់ Xherdan សម្រាប់ការលះបង់របស់គេនៅ ៣ រដូវកាលមកនេះ ហើយយើងក៏ជូនពរឲ្យគេជួបរឿងល្អបំផុតនៅពេញមួយអាជីព"។
គួររំឭកថា កីឡាករស្វីសបង្ហាញខ្លួន ៦៣ ប្រកួតសរុបឲ្យហង្សក្រហម ដោយគេក៏ជាចំណែកជួយក្រុមឈ្នះពាន Premier League, Champions League, Club World Cup និង UEFA Super Cup ផងដែរ។ នេះជាកីឡាករទី ២ ហើយដែលផ្ទេរចេញពី Premier League ទៅ Lyon ដោយកន្លងមក គឺ Emerson Palmieri ដែល Chelsea ផ្ទេរឲ្យខ្ចីជើងទៅទីនោះ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
