ជ្រើសរើសរូបភាពមួយ ដើម្បីទទួលបានសារអប់រំចិត្តដ៏ល្អសម្រាប់ជីវិតអ្នកពេលនេះ
តាមរយៈការជ្រើសរើសនូវរូបភាព ១ ក្នុងចំណោមរូបភាពទាំង ៣ ដែលអ្នកគិតថាពេញចិត្តបំផុត យើងនឹងបើកបង្ហាញឲ្យអ្នកទទួលបាននូវសារណែនាំសម្រាប់ជីវិតរបស់អ្នកនៅពេលនេះ៖
រូបភាពទី ១
"ជីវិតគឺជាការផ្តល់ឲ្យនូវឱកាសថ្មី"។ មេរៀនទាំងអស់ពីមុន មិនសុទ្ធតែអាក្រក់ទាំងអស់នោះទេ ដ្បិតវាធ្លាប់បានធ្វើឲ្យអ្នកឈឺចាប់ តែវានៅតែជាបទពិសោធន៍ដែលឆ្លុះឲ្យអ្នកបានឃើញ និងបានស្គាល់ពីមនុស្សជុំវិញខ្លួនកាន់តែច្បាស់។
ជាសារណែនាំវាដល់ពេលហើយដែលអ្នកត្រូវលាងស្នាមរបួសកាលពីអតីតកាល ហើយបើកទ្វារទទួលយកឱកាសថ្មី ទទួលយកមនុស្សថ្មីមកក្នុងជីវិតរបស់អ្នក។ ការផ្តល់ឱកាសថ្មីសម្រាប់ខ្លួនឯង លាយឡំនឹងបទពិសោធន៍ដែលធ្លាប់ជួបកន្លងមក យើងអាចធានាបានថា អ្នកនឹងជួបផលល្អប្រសើរជាងមុន។
រូបភាពទី ២
អ្នកដែលជ្រើសរើសរូបភាពមួយនេះ ភាគច្រើនគឺពួកគេកំពុងមានការហត់នឿយខ្លាំង ឬពួកគេបានឆ្លងកាត់រឿងលំបាកច្រើនណាស់ហើយក្នុងជីវិត។ ដំណើរជីវិតរាប់ពាន់យោជរបស់ពួកគេ សឹងតែពេលខ្លះពួកគេរកពេលសម្រាកមិនបាន រកពេលសម្រាប់ខ្លួនឯងមិនបាន ដែលម្តងម្កាលនាំឲ្យខ្លួនឯងលែងមើលឃើញពីតម្លៃនៃជីវិត។
អ្នកដល់ពេលហើយដែលត្រូវបង្កើតពេលវេលាសម្រាកខ្លះ ដកឃ្លាពីបញ្ហាទាំងឡាយខ្លះក្នុងជីវិត។ ត្រូវចាំថា មិនមែនរស់នៅដើម្បីតែរស់ តែត្រូវរស់ដើម្បីគុណតម្លៃនិងសេចក្តីស្រលាញ់ពីមនុស្សជុំវិញខ្លួន។
គួរឆ្លៀតពេលសម្រាកបន្តិច ដើរលំហែកាយបន្តិច ហើយយកពេលនោះរៀបចំនិងគិតអំពីផែនការណ៍ថ្មីដែលត្រូវដើរ និងរំឭកឡើងមកវិញនូវអ្វីដែលអ្នកបានសម្រេចកន្លងមក ដែលវាក៏ជាសារជំរុញចិត្ត ឲ្យអ្នកប្រឹងប្រែងបន្តទៅមុខទៀតបានដែរ។
រូបភាពទី ៣
ចូរដោះលែងខ្លួនឯង ពីដំណើររាំងស្ទះដែលបិទផ្លូវមិនឲ្យឈានដល់គោលដៅរបស់អ្នក។ ជាការពិតយើងមិនអាចបិទមាត់មនុស្សជុំវិញខ្លួនបានទេ តែយើងអាចបិទត្រចៀកមិនឲ្យស្តាប់លឺនៅពាក្យដែលគេនិន្ទាបាន។
មិនសុទ្ធតែពាក្យទាំងអស់ គួរតែទទួលយកមកក្នុងចិត្តឡើយ ព្រោះពាក្យខ្លះបើស្តាប់ហើយ ព្យាយាមគិតពេក រមែងធ្វើឲ្យអ្នកបាត់បង់ភាពជាខ្លួនឯង បាត់បង់គោលជំហររបស់ខ្លួនឯង ក៏នាំឲ្យដំណើរដែលកៀកនឹងដល់គោលដៅទៅហើយ បែរជាជាប់គាំងទៅវិញ។
ជាសារណែនាំ ចូរអ្នកប្រកាន់គោលជំហររបស់ខ្លួនឯង ហើយស្តាប់អ្នកដទៃឲ្យបានតិចជាងស្តាប់បេះដូងខ្លួនឯង នោះទើបអ្នកអាចសម្រេចជោគជ័យបាន។ មានតែអ្នកខ្លួនឯងទេ ជាអ្នកបង្កើតឱកាសសម្រាប់ខ្លួនឯង ហើយនៅរាល់បញ្ហាទាំងឡាយ ត្រូវយកខ្លួនឯងទៅដោះស្រាយ ចូរកុំពឹងផ្អែកឬរង់ចាំអ្នកដទៃជាជំនួយឲ្យសោះ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
