ស្គាល់ជម្រើសជាតិសាន់ម៉ារីណូអត់? មានកីឡាករអាជីពតែ៣នាក់ប៉ុណ្ណោះ សល់ពីនេះគឺអ្នកលក់ឡាន អ្នកឌីសាញក្រាហ្វិក និងពេទ្យធ្មេញ
កាលពីម្សិលមិញក្រុមជម្រើសជាតិអង់គ្លេសបានយកឈ្នះ៥ទល់០លើជម្រើសជាតិមួយដែលមានចំណាត់ថ្នាក់ទាបជាងគេបំផុតក្នុងតារាងFIFA គឺ សាន់ម៉ារីណូក្នុងវគ្គជម្រុះ2022 World Cup Qualifiers តំបន់អឺរ៉ុបនៅកីឡដ្ឋានWembley Stadium។
អ្វីដែលគួរឲ្យភ្ញាក់ផ្អើលបំផុតនោះគឺជម្រើសជាតិ San Marino មានកីឡាករអាជីពតែ៣នាក់ប៉ុណ្ណោះហើយសល់ពីនេះសុទ្ធតែជាកីឡាករចូលក្រៅម៉ោង។ ពួកគេមួយចំនួនគឺជាអ្នករចនាក្រាហ្វិក ទន្តពេទ្យ និងសូម្បីតែអ្នកលក់ឡាន។ ខណៈដែលប្រជាជិតមួយនេះមានប្រជាជនតែ៣៣០០០នាក់ហើយឈរលំដាប់លេខ២១០ក្នុងពិភពលោក សាន់ម៉ារីណូមានតែលីគពាក់កណ្ដាលអាជីពមួយប៉ុណ្ណោះហើយភាគច្រើនពួកគេមានឈ្មោះក្នុងជម្រើសជាតិ។
ជាការពិតណាស់! មុនជួបជម្រើសជាតិអង់គ្លេស កីឡាករទាំងនេះចំនួនពាក់កណ្ដាលមិនដែលបានលេងក្នុងការប្រកួតប្រជែងកម្រិតខ្ពស់ណាមួយឡើយ ហើយខ្លះខានលេងបាល់២ទៅ៣ខែដោយសារការឆ្លងវីរុសកូវីដ១៩ ដែលសូម្បីតែលីគបាយបានរបស់ខ្លួនក៏ត្រូវបិទដែរ។
Franco Varella គ្រូបង្វឹកជម្រើសជាតិ San Marino បាននិយាយថា៖“ យើងទើបតែចាប់ផ្តើមហ្វឹកហាត់កាលពីខែមុន។គុណភាពរបស់យើងអន់ឆ្ងាយពីកីឡាករលេងនៅ Premier League ខ្លាំងណាស់។ វាពិតជាលំបាកណាស់ដែលលេងជាមួយពួកគេ។ ប៉ុន្តែក្តីសុបិន្តក្នុងការលេងជាមួយក្រុមដ៏អស្ចារ្យមួយបានក្លាយជាការពិត។ គោលដៅរបស់យើងគឺចូលប្រឡូកក្នុងទីលាន ហើយមិនចាញ់ដោយមានគ្រាប់បាល់ច្រើននោះទេ” ។
ខ្សែប្រយុទ្ធជម្រើសជាតិ សាន់ម៉ារីណូ កីឡាករ Vitaioli ដែលមានការងារជារចនាក្រាហ្វិក បានពីពណ៌នាអំពីការលេងជាមួយជម្រើសជាតិអង់គ្លេសថាសុបិនក្លាយជាការពិត។ លោកបាននិយាយថា៖ "ឥឡូវនេះយើងកំពុងស្ថិតនៅលើទីលានជាមួយកីឡាករឆ្នើម ដែលយើងតែងតែមើលតាមទូរទស្សន៍។ បាល់ទាត់គឺជាក្តីសុបិន្តរបស់ប្រជាជនសានម៉ារីណូ" ។
ទន្ទឹមនឹងនេះដែរ! ខ្សែបម្រើវ័យចាស់ Mirko Palazzi បានពន្យល់ថា ការលេងឲ្យជម្រើសជាតិគឺជាអនុស្សាវរីយ៍ដ៏ស្រស់ស្អាតបំផុតទោះបីជាពួកគាត់បានចំណាយពេលភាគច្រើនក្នុងជីវិតអង្គុយធ្វើការក្នុងការិយាល័យក៏ដោយ។ សម្ដីរបស់គាត់ត្រូវបានគេដកស្រង់ដាក់នៅក្នុងការសែតអង់គ្លេស Mirror ថា“ ខ្ញុំបានលេងនៅ Wembley ៣ ដងហើយវាពិតជាអស្ចារ្យណាស់” ។
"ការលេងនៅពហុកីឡដ្ឋាន Wembley គឺជាពេលវេលាដ៏មានមោទនភាពបំផុតនៃជីវិតរបស់យើង។ យើងធ្លាប់លេងជាមួយក្រុមខ្លាំង ៗ ជាច្រើនដូចជាអេស្បាញ និងអាឡឺម៉ង់ដែលមានកីឡាករអាជីពជាច្រើន"។
"យើងព្យាយាមធ្វើឱ្យមានលក្ខណៈអាជីពតាមដែលអាចធ្វើទៅបាន ទោះបីយើងមិនមែនជាកីឡាករអាជីព និងជាបុគ្គលិកធម្មតាក៏ដោយ ប៉ុន្តែនៅពេលកីឡាករសានម៉ារីណូបញ្ចប់អាជីពរបស់ពួកគេ ការចងចាំដែលល្អបំផុតគឺក្រុមជម្រើសជាតិលេងនៅពហុកីឡដ្ឋានធំ"៕
រក្សាសិទ្ធិដោយ៖ ក្នុងស្រុក
អំពីអ្នកសរសេររបស់យើង៖ PECH PHEARUN
Tel:
ព័ត៌មានថ្មីៗ
