ទីវត្តអារាម ប្រាសាទស្រះកណ្តាល លាក់ខ្លួនដូចឋានសួគ៌លើដី ការពិតស្ថិតនៅក្នុងខេត្តបន្ទាយមានជ័យសោះ
ទីវត្តអារាមបែបព្រះពុទ្ធសាសនាមួយ ត្រុវបានគេដឹងថាជាវត្តដែលស្អាត និងមានរបៀបជាងគេនៅស្រុកខ្មែរ ព្រោះតែទីវត្តនេះពិតជាធំស្កឹមស្កៃ និងមានការរៀបចំសាងសង់ដ៏ល្អឥតខ្ចោះតែម្តង ដោយវត្តនេះ ត្រូវបានគេស្គាល់មានឈ្មោះថា « វត្តប្រាសាទស្រះកណ្តាល ហៅវត្តខ្ចាស់។
អ្វីដែលគួរអោយកត់សំគាល់ និងធ្វើឱ្យទីវត្តនេះមានភាពល្បីល្បាញនោះ គឺដោយសារតែវត្តនេះមានការកសាងយ៉ាងច្រើនដែលជាបែបបទព្រះពុទ្ធសាសនា ហើយក៏ឃើញមានសំណង់កំពុងក៏សាងយ៉ាងច្រើនទៀតផងដែរ។ ដោយវត្តនះក៏ត្រូវគេដឹងថាចាប់កសាងឡើងតាំងពីឆ្នាំ ២០១០ មកម្ល៉េះ ដោយ ព្រះមហាធម្មាលង្ការោ ចាន់ សុជន ប្រធានស្ដីទីនៃសមាគមធម្មកថិកកម្ពុជា និងជាព្រះចៅអធិការវត្តប្រាសាទស្រះកណ្ដាល(ខ្ចាស់) បន្ទាប់ពីព្រះអង្គបានបញ្ចប់ការសិក្សាដោយជោគជ័យថ្នាក់កម្រិតបរិញ្ញាបត្រជាន់ខ្ពស់ផ្នែកទស្សនវិជ្ជានៅប្រទេសស្រីលង្ការួចមក នៅឆ្នាំ២០១៣ ព្រះអង្គបានធ្វើមាតុភូមិនិមន្ដន៍មកកាន់ប្រទេសកម្ពុជាវិញ ដោយគង់ស្នាក់នៅក្នុងវត្តប្រាសាទស្រះកណ្ដាល (ខ្ចាស់) ជាអារាមកំណើតរបស់ព្រះអង្គ ។
ចាប់តាំងពីឆ្នាំ២០១០ មកទល់នឹងពេលបច្ចុប្បន្ន ក្រោយការធ្វើមាតុភូមិនិមន្ដន៍របស់ព្រះមហាធម្មាលង្ការោ ចាន់ សុជន មក ព្រះអង្គបានកៀងគរដឹកនាំពុទ្ធបរិស័ទសាងសង់សមិទ្ធផលសម្រេចជាបន្តបន្ទាប់ដូចជា៖ -ស្រះទឹកដ៏ធំមួយ ប្រវែង១៧០ម៉ែត្រ×៣៥ម៉ែត្រ(បច្ច័យបានមកពីបុណ្យផ្កាប្រាក់), របងជុំវិញអាវាសវត្ត (សទ្ធាពុទ្ធបរិស័ទទាំង៥ភូមិនិងបរិស័ទជិតឆ្ងាយ), វច្ចកុដិ៥ (បច្ច័យវត្ត), កុដិសីល១ល្វែង មាន៥បន្ទប់ (សទ្ធាពុទ្ធបរិសទ្យជុំវិញវត្ត), កុដិសមាធិ១ល្វែង មាន៥បន្ទប់ (សទ្ធាពុទ្ធបរិស័ទ), កុដិបញ្ញា១ល្វែង មាន៥បន្ទប់ (សទ្ធាពុទ្ធបរិសទ្យ), បានចូលរួមបច្ច័យចំនួន១២.០០០ដុល្លារ កសាងកុដិវត្តបទុមវតី ក្រុងភ្នំពេញ, ប្រព័ន្ធអគ្គិសនី (បច្ច័យវត្ត) ។
ប្រព័ន្ធទឹកស្អាតនិងបណ្ដាញទឹក (សទ្ធាពុទ្ធបរិសទ្យក្នុងនិងក្រៅស្រុក), អគារពុទ្ធិកសិក្សា(សទ្ធារបស់លោក ផាន់ វណ្ណរ័ត្ន និងភរិយា), កុដិទសពិធរាជធម៌ មាន១០បន្ទប់(សទ្ធារបស់លោកនាយឧត្តមសេនីយ៍កែ គឹមយ៉ាន), កុដិទសបារមី១០បន្ទប់ (សទ្ធារបស់សប្បុរសជននៅក្រៅប្រទេស), វច្ចកុដិ២០បន្ទប់(ជំនួយរបស់អង្គការFra), ឈាបនដ្ឋាន១ (ជំនួយអង្គការFra), កុដិសារីបុត្រ១បន្ទប់ (សទ្ធារបស់សប្បុរសជននៅក្រៅប្រទេស), កុដិអានន្ទ១បន្ទប់(សទ្ធារបស់ឧបាសិកា ឡេង ឈុនកួយ) និងការចាក់ដីបំពេញទីវត្ត មានទំហំ៧៥.០០០ម៉ែត្រការ៉េ (សទ្ធាបរិស័ទជិតឆ្ងាយទាំងក្នុងនិងក្រៅប្រទេស) ។
ឯសមិទ្ធផលអន្ដរកាលទី២ (២០១៧-២០១៩) មានដូចជា ធម្មបណ្ណាល័យ សម្រាប់តម្កល់គម្ពីរដីកានិងក្បួនច្បាប់, សួនច្បារ៤កន្លែង (សួនព្រះជយវរ្ម័នទី៧, សួនសមាធិ, សួនអភ័យទាន និងសួនពុទ្ធសា្ថន), ខឿនពោធិព្រឹក្សនិងសំវេជនីយដ្ឋាន៤កន្លែង (កន្លែងទ្រង់ប្រសូត កន្លែងទ្រង់ត្រាស់ដឹង កន្លែងទ្រង់សម្ដែងធម្មចក្រ និងកន្លែងទ្រង់បរិនិព្វាន), ថូបារាមចម្លងពីប្រទេសស្រីលង្កា, សិង្គុត្តរចេតិយចម្លងពីប្រទេសភូមា, គជទ្វារ(ខ្លោងទ្វាររូបដំរី)ទាំង៤ទិស កសាងរួចរាល់បាន២ទិស, ផ្លូវក្រាលបេតុងខ្វាត់ខ្វែងក្នុងផ្ទៃវត្តជាច្រើនខ្សែ សរុបប្រមាណ១៥០០ម៉ែត្រ, កម្រាលបេតុងក្នុងផ្ទៃវត្តរាប់រយម៉ែត្រក្រឡា, កុដិនាថករណធម៌១០បន្ទប់, វច្ចកុដិថ្មី(បង្គន់)ចំនួន៣០បន្ទប់, កញ្ចុះធំ-តូចនិងទោងឈើសម្រាប់អង្គុយកម្សាន្ដនិងធ្វើធម្មកិច្ច សរុបទាំង២៥កន្លែង និងសេនាសនៈផ្សេងៗទៀត (ឃ្លាំងបរិក្ខារ,ឃ្លាំងគរុភណ្ឌ…) ។
ចំណែកឯគម្រោងសមិទ្ធិផលនាពេលអនាគត ដែលកំពុងនឹងបន្ដសាងសង់ មានដូចជា ព្រះវិហារសុវណ្ណប្រាសាទ បានកំពុងនឹងសាងសង់បន្ដ, ថែវគោបុរៈ(របងជុំវិញព្រះវិហារទាំង៤ទិសដែលមានបុស្បុក៨) បាន កំពុងនឹងសាងសង់, ព្រះពុទ្ធរូបអង្គធំកម្ពស់៨០ម៉ែត្រ បានកំពុងនឹងបុកគ្រឹះសាងសង់, គជទ្វារ(ខ្លោងទ្វាររូបដំរី)នៅសល់ពីរទិស បានកំពុងនឹងសាងសង់, ស្ពាននាគទាំង៤ទិស បានកំពុងនឹងសាងសង់, អគារពុទ្ធសាសនិកជនអក្សរអិល (L) ពីរល្វែង និងបួនជាន់ ដែលអគារនីមួយៗមានទំហំ៦៨ម៉ែត្រ×១២ម៉ែត្រ កម្ពស់២២ម៉ែត្រ បានកំពុងនឹងបុកគ្រឹះសាងសង់ ។
គួរឱ្យដឹងផងដែរថា វត្តប្រាសាទស្រះកណ្តាល (ខ្ចាស់) ដែលមានទីតាំងនៅក្នុងភូមិខ្ចាស់ ឃុំបុស្បូវ ស្រុកព្រះនេត្រព្រះ ក្រុងសិរីសោភ័ណ ខេត្តបន្ទាយមានជ័យ មកដល់ឥឡូវនេះ សមិទ្ធផលទាំងនេះបានផុសបង្អួតខ្លួនយ៉ាងស្កឹមស្កៃថ្មីសន្លាងត្រដែតត្រដឹមងើបឈរឡើងយ៉ាងព្រោងព្រាតពាសពេញទីវត្តអារាម ដែលពីមុនមកជាទីព្រៃស្មសាន វាលរហោឋានមានតែដុបគុម្ពោតប៉ុណ្ណោះ ៕
អំពីអ្នកសរសេររបស់យើង៖ Writers
Tel:
ព័ត៌មានថ្មីៗ
