កាបូបកំប្លោក ត្បាញឱ្យដៃខ្មែរផ្ទាល់ មានតម្លៃថ្លៃបន្តិច តែបើងាកពីវិធីផលិតបានដឹងថាមិនងាយឡើយ
បច្ចុប្បន្ន មនុស្សជាច្រើនបានងាកមករក Fashion បែប Classic លក្ខណៈបុរាណ តែបែបទំនើបទាន់សម័យ ហើយកាបូបកំប្លោកដែលធ្វើចេញពីស្នាដៃខ្មែរពិតៗ បាននឹងកំពុងតែពេញនិយមប្រើប្រាស់ខ្លាំងមិនចាញ់កាបូបប្រ៊េនធំៗផ្សេងឡើយ។
យ៉ាងណាមិញ ក៏មានមនុស្សជាច្រើនដែលមិនសូវយល់ច្បាស់ពីផលិតផលសិប្បកម្មដែលធ្វើពីដៃ ថាវាមានការលំបាក និងផ្ចិតផ្ចង់បែបណាទេ តែពួកគេបែរជាមានការមិនពេញចិត្តដែលផលិតផលកាបូបសិប្បកម្មពីកំប្លោកនេះបែរជាមានតម្លៃរាងថ្លៃទៅវិញ។
គួរឱ្យដឹងផងដែរថា កាបូបកំប្លោកនីមួយៗ ការពិតទៅ ទម្រាំធ្វើបានចេញជាកាបូបមួយៗមិនងាយទេ ត្រូវចុះកាត់កំប្លោកដោយដៃ ហើយមើលពីកំផ្លោកនោះថាខ្ចី ឬ ចាស់ អាចកាត់បានឬក៏អត់ ហើយប្រវែងស្តង់ដាត្រូវកាត់ប៉ុណ្ណា។ បន្ទាប់មកទៀតត្រូវយកកំប្លោកដែលកាត់រួច មកលាងទឹកឱ្យស្អាតហើយត្រូវហាលថ្ងៃអោយស្ងួតល្អ ដែលប្រើរយៈពេលដល់ទៅ ២០ថ្ងៃ ទៅ ១ខែកន្លះឯណោះ ទើបអាចយកមកក្រងជាកាបូបមួយៗបាន។ ពិសេសពេលក្រងទៀតនោះ គឺត្រូវក្រងយ៉ាងផ្ចិតផ្ចង់ដោយដៃ ឱ្យត្រូវនឹងពុម្ព ម៉ូតតូច ឬធំ រួចយកមកតុបតែងបន្ថែមតាមតម្រូវការភ្ញៀវទៀត។
តែយ៉ាងណាក៏ដោយ ក៏មានអ្នកប្រើប្រាស់ជាច្រើនបានយល់ដឹងពីការប្រឹងប្រែង ជាមួយនឹងផលិតផលការងារដោយដៃនេះ ពោរពេញដោយក្តីស្រឡាញ់ផងដែរ៕
ប្រភពរូបភាពនិងដកស្រង់អត្ថបទពី៖ Sethika Online Shop - សិទ្ធិកា
ព័ត៌មានថ្មីៗ
