ប្រយ័ត្នរាសីដាក់! បើមិនចង់ឱ្យជីវិតអ្នកមិនស្រកស្រុត ដុនដាប ដាច់ខាតកុំបន្ទោសមនុស្ស ៤ ក្រុមនេះ
មនុស្សដែលស្ថិតក្នុង ៤ ក្រុមនេះ គឺជាមនុស្សដែលស្និទ្ធស្នាលជាមួយនឹងអ្នកបំផុត ដូច្នេះហើយ មិនថាមានរឿងអ្វីក៏ដោយ ដាច់ខាតកុំស្រែកគំហក ស្ដីបន្ទោស ខឹងសម្បារចំពោះពួកគាត់ឱ្យសោះ បើមិនដូច្នោះទេ ដំណើរជីវិតរបស់អ្នកមិនអាចដុះដាលបានល្អឡើយ។
១. កុំបន្ទោសឪពុកម្តាយក្រីក្រ
ឪពុកម្តាយបានផ្តល់ជីវិត និងចិញ្ចឹមបីបាច់ថែរក្សាយើងតាំងពីកើតរហូតដល់ធំដឹងក្ដី។ តាមសមត្ថភាពរបស់ពួកគេ ពួកគាត់អាចផ្តល់អ្វីគ្រប់យ៉ាងដែលពួកគាត់មាន និងផ្តល់ឱ្យអស់ពីសមត្ថភាពដល់កូនៗតាមដែលអាចធ្វើទៅបាន។ ហេតុដូច្នេះហើយ ត្រូវចេះដឹងគុណ កុំបន្ទោសឪពុកម្តាយក្រីក្រ ព្រោះជីវិតនេះមិនដូចការរំពឹងទុក ឬបានតាមចិត្តចង់របស់យើងទេ។
ឪពុកម្តាយផ្ដល់ជីវិតដល់យើង ដូច្នេះហើយទៅថ្ងៃមុខអនាគត និងជីវិតចុងក្រោយរបស់គាត់ គឺមានតែពឹងផ្អែកលើកូនស្រីប្រុសនេះហើយ។ របៀបដែលអ្នករស់នៅក្នុងជីវិតរបស់អ្នក អនាគតរបស់អ្នកនឹងទៅជាយ៉ាងណា អាស្រ័យលើថាតើអ្នកខំប្រឹងប្រែង ឬរីកចម្រើនបានដល់កម្រិតណា។ ទោះបីជាជីវិតលំបាក ឬក្រក៏ដោយ ចូរដឹងគុណ និងកតញ្ញូចំពោះឪពុកម្ដាយជានិច្ច។
២. កុំបន្ទោសបងប្អូន នូវការបំពេញកាតព្វកិច្ចចំពោះឪពុកម្ដាយ
ការគោរពមាតាបិតាជាកាតព្វកិច្ចរបស់អ្នក ការគោរពមាតាបិតា នឹងជួយឱ្យចិត្តបានស្ងប់។ ដូច្នេះកុំប្រៀបធៀបខ្លួនអ្នកជាមួយបងប្អូនបង្កើតរបស់អ្នក មនុស្សគ្រប់គ្នានឹងមានវិធីផ្សេងគ្នានៃការធ្វើជាកូនល្អ។ ជាពិសេសនៅពេលដែលឪពុកម្តាយអ្នកឈឺ អ្នកគួរតែចូលរួមចំណែកជាថវិកា និងការខំប្រឹងប្រែងមើលថែពួកគាត់ ហើយមិនត្រូវមានការជំទាស់អ្វីជាមួយបងប្អូនដទៃទៀតឡើយ។
ធ្វើខ្លួនឱ្យល្អជាឪពុកម្តាយរបស់អ្នក ហើយមិនចាំបាច់ប្រៀបធៀបទេ។ ការប្រៀបធៀបខ្លួនឯងជាមួយបងប្អូននឹងច្បាស់ជាបង្កជម្លោះ ធ្វើឱ្យឪពុកម្តាយខកចិត្ត និងខូចចិត្តជាខ្លាំង។ គ្រាន់តែបំពេញកាតព្វកិច្ចរបស់អ្នក និងគោរពឪពុកម្តាយរបស់អ្នកតាមរបៀបដ៏បរិសុទ្ធបំផុត។ បើអ្នកប្រៀបធៀបខ្លួនឯងជាមួយនឹងបងប្អូនរបស់អ្នក នោះគឺជាកត្តញ្ញូក្លែងក្លាយហើយ។
៣. កុំបន្ទោសប្រពន្ធ
ប្តីប្រពន្ធជាមនុស្សកាន់ដៃគ្នារហូតដល់ចាស់ ត្រូវរស់នៅជាមួយគ្នា ចិញ្ចឹមបីបាច់ថែរក្សាកូនជាមួយគ្នា ដូច្នេះត្រូវយល់ដឹង និងគោរពគ្នាទៅវិញទៅមក ។ យ៉ាងណាមិញ បុរសខ្លះពេលរស់នៅក្នុងភាពក្រីក្រ ពិបាកតោកយ៉ាក តែងតែស្តីបន្ទោសឈ្លោះទាស់ជាមួយប្រពន្ធ ដោយគិតថាព្រោះតែប្រពន្ធទើបជួបតែរឿងអាក្រក់ឮ រកស៊ីមិនឡើង។ ជាក់ស្ដែងបុរសដែលមានសមត្ថភាព នឹងមិនគេចពីការទទួលខុសត្រូវឡើយ។ ពួកគេតែងតែស្វែងរកមូលហេតុពីខ្លួនឯងជាមុនសិន មុននឹងស្ដីបន្ទោស ឬរករឿងឈ្លោះជាមួយនឹងប្រពន្ធ។
៤. កុំស្ដីបន្ទោស ជះកំហឹងទៅលើកូនៗ
មនុស្សមួយចំនួនក្នុងជីវិត នៅពេលដែលពួកគេត្រូវបានគេប្រព្រឹត្តមិនល្អនៅកន្លែងធ្វើការ ឬស្ថិតក្រោមសម្ពាធខ្លាំងពេកក្នុងជីវិត មានអារម្មណ៍មិនល្អ ហើយគ្មានកន្លែងណាដើម្បីសម្រាលទុក្ខខ្លួនឯង នោះនឹងបញ្ចេញកំហឹងទៅលើកូនខ្លួនឯង។ ពួកគេគិតថា ការបន្ធូរអារម្មណ៍ទៅកាន់កូន វាជារឿងធម្មជាតិដែលពួកគេខឹង គ្មានអ្វីដែលខុសនោះឡើយ។ ប៉ុន្តែអ្នកត្រូវដឹងថា កូនៗរបស់អ្នកនឹងសប្បាយចិត្តនៅពេលដែលបរិយាកាសគ្រួសារកក់ក្តៅ ហើយឪពុកម្តាយក៏ស្រលាញ់គ្នា។
ដូច្នេះក្នុងនាមជាឪពុកម្តាយ អ្នកត្រូវតែយល់ថា ទោះបីកូននៅក្មេងក៏ដោយ ក៏ពួកគេនៅតែមានតម្លៃ ដូច្នេះមិនថារាងកាយ ផ្លូវចិត្ត ឬផ្លូវអារម្មណ៍ទេ ពួកគេមិនគួរត្រូវទទួលរងនូវការវាយដំ ជាន់ឈ្លី ស្រែកគំហក ស្ដីបន្ទោស ជះកំហឹងពីអ្នកដែលជាឪពុកម្ដាយនោះឡើយ៕
ព័ត៌មានថ្មីៗ
