លើសពីភេសជ្ជៈដាស់អារម្មណ៍ ការទទួលទានកាហ្វេនៅម៉ោងទាំង ៤ អាចនាំប្រយោជន៍ច្រើនណាស់
កាហ្វេមិនមែនត្រឹមតែជាភេសជ្ជៈជួយដាស់អារម្មណ៍ ធ្វើឲ្យអ្នកមានការផ្តោតទៅលើអ្វីមួយនោះទេ ទៀតសោតក៏មានប្រយោជន៍ដទៃទៀតផងដែរ។
តើអ្នកមានដឹងទេថា ត្រឹមតែការទទួលទានកាហ្វេ ក៏មានឥទ្ធិពលល្អសម្រាប់មុខងារថ្លើម និងសរីរាង្គមួយចំនួន ក្នុងរាងកាយដែរនោះ? ជាពិសេសប្រសិនអ្នកទទួលទានត្រូវម៉ោងមាសទាំង ៤ ខាងក្រោម៖
៤) ចាប់ពីម៉ោង ១០:០០ ព្រឹក ដល់ ១១:៣០ ព្រឹក
មនុស្សជាច្រើនតែងតែមានទម្លាប់ផឹកកាហ្វេនៅពេលព្រឹកព្រលឹម ឬសូម្បីតែជំនួសអាហារពេលព្រឹក យ៉ាងណាវាជាទម្លាប់មិនល្អទេ។
ប្តូរមកវិញ អ្នកគួរទទួលទាននៅចន្លោះពីម៉ោង ១០:០០ ទៅ ១១:៣០ នាទីព្រឹក នេះជាពេលវេលាល្អ បន្ទាប់ពីស្រស់ស្រូបអាហារពេលព្រឹក ហើយក៏ជាពេលអ័រម៉ូនស្រ្តេសចុះថយ ជួយឲ្យអ្នកមានអារម្មណ៍ភ្លឺស្វាង និងល្អចំពោះមុខងារថ្លើម។
៣) ៣០ នាទីក្រោយទទួលទានអាហារ
កាហ្វេក៏មានឥទ្ធិពលលើកកម្ពស់ប្រព័ន្ធរំលាយអាហារបានយ៉ាងល្អផងដែរ ដូច្នេះអ្នកគួរតែផឹកប្រហែលក្រោយ ៣០ នាទីពេលទទួលទានអាហាររួច ដោយវាមិនត្រឹមតែធ្វើឲ្យដំណើរការរំលាយអាហារមានភាព រលូនប៉ុណ្ណោះទេ ទៀតសោតក៏បញ្ចៀសអាការៈហើមពោះផងដែរ។
២) ចាប់ពីម៉ោង ១៣:០០ ដល់ ១៥:០០
បន្ទាប់ពីម៉ោង ១ រសៀល អ័រម៉ូនស្រ្តេស Cortisol ក៏ចាប់ផ្តើមធ្លាក់ចុះ ដែលធ្វើឲ្យអ្នកមានអារម្មណ៍ងងុយគេង ច្របូកច្របល់។ នៅពេលនេះ គួរដាក់កាហ្វេ ១ ពែង ដើម្បីជួយដាស់អារម្មណ៍ឲ្យភ្ញាក់មកវិញ។
ទោះជាយ៉ាងណា កុំផឹកកាហ្វេក្រោយម៉ោង ៣ រសៀល ព្រោះវាអាចធ្វើឲ្យអ្នកគេងមិនលក់នៅពេលយប់។
១) មុនពេលហាត់ប្រាណ
កាហ្វេមួយពែង មុនពេលហាត់ប្រាណ ៣០ នាទី នឹងជួយបង្កើនការរំលាយអាហារ និងដុតបំផ្លាញកាឡូរីបានកាន់តែល្អ ហើយជួយឲ្យសកម្មភាពធ្វើលំហាត់ប្រាណឆាប់សម្រេចបានយ៉ាងប្រសើរផងដែរ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
