Ronaldo មានមហិច្ឆតាចង់លើ Messi រឿងនេះសិន ទើបព្រមចូលនិវត្តពីបាល់ទាត់
តារាឆ្នើម Cristiano Ronaldo បានប្រកាន់គោលជំហរ លើភាពជោគជ័យមួយ ដោយចង់នាំមុខទៅលើគូប្រជែងគឺ Lionel Messi មុននឹងលោកប្រកាសព្យួរស្បែកជើងពីអាជីពជាកីឡាករបាល់ទាត់។ នេះបើតាមការលើកឡើងរបស់នាយកជាន់ខ្ពស់នៃស្ថាប័ន France Football លោក Pascal Ferre។
នោះគឺកីឡាករព័រទុយហ្គាល់ ចង់លើកពានរង្វាន់ Ballon d'Or ច្រើនជាងកីឡាករអាហ្សង់ទីន ខណៈដែលបច្ចុប្បន្ន Ronaldo ទទួលបាន ៥ លើក តិចជាង ១ លើកធៀបនឹង Messi។ លើកចុងក្រោយសម្រាប់ CR7 ដែលបានឈ្នះពានឯកត្តជនខាងលើ គឺនៅឆ្នាំ ២០១៧ រីឯ M10 នៅឆ្នាំ ២០១៩ ខណៈ ២០២១ មិនទាន់រកម្ចាស់ជានរណានៅឡើយ។
តាមរយៈការបញ្ជាក់ពីលោក Ferre និយាយប្រាប់ទៅ New York Times៖ "Ronaldo គេមានមហិច្ឆតាធំមួយ នោះគឺចង់ចូលនិវត្ត ដោយបានឈ្នះ Ballon d'Or ច្រើនជាង Messi ខ្ញុំបានដឹងរឿងនេះ ព្រោះគេបានប្រាប់វាមកកាន់ខ្ញុំ"។ បញ្ជាក់ថា ព្រឹត្តិការណ៍ប្រកាសពានខាងលើ នៅឆ្នាំ ២០២១ នឹងធ្វើឡើងនៅថ្ងៃទី ២៩ វិច្ឆិកា៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
