Benzema អត់ព្រមផ្ទេរទៅ Newcastle ទេ លុះត្រាក្លឹបមួយនេះបើកភ្លើងខៀវ ទើបព្រមទៅ
ខ្សែប្រយុទ្ធ Karim Benzema បច្ចុប្បន្ននៅតែបន្តទម្រង់លេងដ៏ល្អ ជាមួយក្លឹប Real Madrid ដ្បិតបើឈានចូលវ័យ ៣៣ ឆ្នាំទៅហើយក៏ដោយ ប៉ុន្តែស្ថិតិការលេងឲ្យស្តេចស នៅតែបន្តលេចធ្លោ ជាក់ស្តែងរដូវកាល ២០២១/២២ គេបង្ហាញខ្លួន ១៥ ប្រកួត រកបាន ១៤ គ្រាប់និង Assist ៨ លើក។
ស្របពេលដែលសុពលភាពកុងត្រារបស់កីឡាករបារាំង កៀកនឹងផុតនៅចុងខែមិថុនា ឆ្នាំ ២០២៣ ខាងមុខផង ក៏ជាហេតុនាំឲ្យក្លឹបមួយចំនួនបើកការចាប់អារម្មណ៍ចង់បាន Benzema ឲ្យចេញពី Real Madrid។ ក្នុងនោះក៏មានក្លឹបទើបឡើងម្ចាស់ថ្មី Newcastle United ផងដែរ ដោយតាមរបាយការណ៍ពី El Nacional ចុះផ្សាយថា ក្លឹបសារិកាព្រៃ នឹងមិនខ្លាចចំណាយនោះទេ ឲ្យតែ Benzema ព្រមផ្ទេរមកចូលរួម។
យ៉ាងណាតាមប្រភពដដែលបានឲ្យដឹងថា ករណីដែលក្លឹប Real Madrid ព្រមអនុញ្ញាតឲ្យខ្ញីចាស់វ័យ ៣៣ ឆ្នាំចាកចេញ ក៏លុះត្រាណាតែក្លឹបអាចយកបាន Kylian Mbappe និង Erling Haaland ព្រមគ្នានៅពេលខាងមុខ។ ប៉ុន្តែសម្រាប់សាមីខ្លួនផ្ទាល់ បើចាកចេញក៏គេមិនជ្រើសរើសក្លឹប Newcastle ដែរ ផ្ទុយទៅវិញ គឺលុះត្រាណាតែក្លឹប Paris Saint-Germain តែមួយគត់ ទើបគេព្រមទៅ។
គួររំឭកថា ចាប់តាំងពីការផ្ទេរមក Real Madrid តារាឆ្នើមខាងលើ បង្ហាញខ្លួនសរុប ៥៧៤ ប្រកួត រកបាន ២៩៣ គ្រាប់ ហើយបានក្លាយជាចំណែកដ៏សំខាន់របស់ក្លឹប ក្រោយការចាកចេញរបស់ Cristiano Ronaldo។ តាមហាងឆេងតម្លៃខ្លួន Benzema អាចថ្លៃល្បាក់ ២៥ លានអឺរ៉ូ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
