មិនចាំបាច់ដល់ផុតកុងត្រា Ronaldo នឹងដើរចេញពី Man Utd ប្រសិនរឿងនេះកើតឡើង
តាមថាសុពលភាពកុងត្រារបស់ Cristiano Ronaldo ជាមួយក្លឹបបិសាចក្រហម Man Utd នឹងត្រូវផុតនៅចុងខែមិថុនា ឆ្នាំ ២០២៣ តែយ៉ាងណាការចាកចេញរបស់កីឡាករព័រទុយហ្គាល់ ក៏មានភាគរយអាចនឹងកើតឡើងមុនផងដែរ ប្រសិនណាតំណែង Top 4 របស់ក្លឹប មិនអាចរក្សាបាន។
ជាការពិតបិសាចក្រហម ដែលដឹកនាំដោយលោក Ole Gunnar Solskjaer រដូវកាលនេះ ធ្វើមិនសូវបានល្អនោះទេ ដោយគិតត្រឹមជុំទី ១១ ពួកគេឈរលេខ ៦ ក្នុងតារាង ចាញ់ ៥ ពិន្ទុធៀបនឹងក្រុម Top 4 គឺ Liverpool។ ទៅមើលស្ថិតិរបស់ CR7 ក៏រាប់ថាល្អគួរសម ដោយ ១២ ប្រកួត រកបាន ៩ គ្រាប់ តែយ៉ាងណាបើការលេងរបស់ក្រុមនៅបន្តធ្លាក់ចុះ នោះលោកក៏មិនអាចបន្តនៅតទៅទៀតដែរ។
បើតាមសារព័ត៌មាន The Express ចុះផ្សាយថា Ronaldo បានឲ្យសញ្ញាព្រមានទៅកាន់ក្លឹបម្ចាស់ដី Old Trafford ហើយ ថាប្រសិនណាបញ្ចប់រដូវកាល ២០២១/២២ ក្រុមមិនអាចរក្សាចំណាត់ថ្នាក់ Top 4 ទទួលបានកៅអីលេងនៅ UEFA Champions League ទេនោះ លោកនឹងជ្រើសរើសផ្លូវបែកមុនអស់កុងត្រា។
ប្រភពពុំបានបញ្ជាក់ឡើយ ថាតារាឆ្នើមវ័យ ៣៦ ឆ្នាំ នឹងជ្រើសរើសការផ្ទេរទៅក្លឹបថ្មីណាមួយនៅពេលខាងមុខ។ តែតាមដឹង ប្រសិន CR7 គិតពីការត្រៀមបញ្ចប់អាជីពនៅក្លឹបបន្ទាប់ នោះគឺមានតែជម្រើសវិលទៅក្លឹបចាស់ Sporting នៅឯលីគកំពូលព័រទុយហ្គាល់ ឬទៅលេងឲ្យក្លឹបនៅសហរដ្ឋអាមេរិក៕
ប្រភព៖ The Express
ព័ត៌មានថ្មីៗ
