Mbappe ទាមទារលក្ខខណ្ឌមួយនេះចាំបាច់ មុនព្រមទម្លាក់ចុងប៊ិចតកុងត្រាថ្មីឲ្យ PSG
សុពលភាពកុងត្រារបស់កីឡាករបារាំង Kylian Mbappe តាមថាគឺត្រូវផុតនៅចុងខែមិថុនា ឆ្នាំ ២០២២ ខាងមុខ តែយ៉ាងណាភាគរយនៃការបន្តថ្មី ជាមួយក្លឹបយក្ស Paris Saint-Germain គឺនៅតែអាចកើតមាន។
យ៉ាងណាពាក់ព័ន្ធនឹងការចរចាកុងត្រាថ្មី បើតាមការបញ្ជាក់ពីម្តាយបង្កើតក៏ដូចជាភ្នាក់ងារផ្ទាល់ខ្លួនរបស់យុវជនវ័យ ២២ ឆ្នាំ គឺអ្នកស្រី Fayza Lamari ក៏សង្កត់ធ្ងន់ថា ក្នុងកិច្ចព្រមព្រៀងពេលខាងមុខ បើវាអាចកើតឡើង ក៏កើតឡើងទៅបាន ក្នុងលក្ខខណ្ឌដែល PSG ព្រមធានាពីការអនុញ្ញាតឲ្យ Mbappe អាចចូលរួមនៅព្រឹត្តិការណ៍អូឡាំពិកឆ្នាំ ២០២៤ ក្នុងទីក្រុងប៉ារីសពេញលេញផងដែរ។
អ្នកស្រី Lamari ប្រាប់សារព័ត៌មាន Le Parisien បែបនេះថា៖ "នោះវានឹងស្ថិតក្នុងកុងត្រារបស់ Mbappe ដោយត្រូវតែអនុញ្ញាតឲ្យជម្រើសជាតិអាចកោះហៅគេទៅចូលរួមនៅអូឡាំពិក ដែលលេងក្នុងទីក្រុងកំណើតរបស់គេបាន ហើយ PSG នឹងមិនហាមឃាត់គេឡើយ"។
គួរបញ្ជាក់ថា ព្រឹត្តិការណ៍កីឡាអូឡាំពិកឆ្នាំ ២០២៤ ដែលត្រៀមប្រារព្ធធ្វើឡើងនៅក្នុងទីក្រុងប៉ារីស គឺនឹងបើកការប្រកួតចន្លោះថ្ងៃទី ២៦ កក្កដា ដល់ ១១ សីហា ដែលពេលវេលានោះ ការលេងក្នុងលីគគឺស្បើយហើយ តែអាចជាប់ការប្រកួតពានរង្វាន់ណាមួយដែលមិនអាចមើលឃើញជាមុនសម្រាប់ក្លឹប PSG៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
