អតីតមិត្តរួមក្រុម Ronaldo ម្នាក់ សរសើរ Messi ថាជាព្រះក្នុងពិភពបាល់ទាត់
ខ្សែការពារនៅក្លឹប Tottenham Hotspur គឺកីឡាករ Cristian Romero បានបង្ហាញការយល់ឃើញ អំពី ការប្រៀបធៀបរវាង Cristiano Ronaldo និង Lionel Messi ខណៈដែលសម្រាប់គេផ្ទាល់ គឺសុទ្ធតែធ្លាប់បានរួមជើងជាមួយកីឡាករទាំងពីរ។
Romero ធ្លាប់ខ្ចីជើងពី Atalanta ទៅលេងឲ្យ Juventus ហើយរួមជើងនៅទីនោះជាមួយ Ronaldo បានមួយរយៈពេលដែរ ខណៈជាមួយ Leo Messi គឺជាមិត្តរួមជម្រើសជាតិអាហ្សង់ទីននឹងគ្នា។ ពួកគេក៏ទើបតែបញ្ចប់ភារកិច្ចជួយក្រុមលើកពាន Copa America កន្លងទៅផងដែរ។
Romero បាននិយាយថា៖ "Messi មិនមែនត្រឹមតែជាកីឡាករល្អម្នាក់ទេ តែគេជាព្រះក្នុងពិភពបាល់ទាត់ ហើយខ្ញុំជឿថាមិនមែនតែខ្ញុំទេ ដែលនិយាយបែបហ្នឹង នរណាចេះមើលបាល់ ស្គាល់ពីបាល់ គឺប្រាកដជាស្គាល់ Messi ហើយនិយាយដូចតែខ្ញុំអ៊ីចឹង"។
លោកបន្ត៖ "ការដែលមានឱកាសរួមជើងជាមួយគាត់ជារឿងដ៏អស្ចារ្យ តែការដែលអាចរួមបន្ទប់ផ្លាស់សំលៀកបំពាក់ជាមួយគាត់ទៀត វាក៏កាន់តែវិសេសវិសាល យើងសុទ្ធតែបានដឹងហើយថា គាត់ជាបុគ្គលល្អមិនត្រឹមតែក្នុងនាមកីឡាករបាល់ទាត់ទេ តែក្នុងនាមជាមនុស្សធម្មតាម្នាក់ ក៏ខ្ញុំគោរពគាត់ខ្លាំងណាស់ដែរ"៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
