Sir Alex ប្រាប់ថ្នាក់លើក្លឹបហើយ ឲ្យយកម្នាក់នេះ ប្រសិនត្រូវដក Ole ចេញពីតំណែង
ដ្បិតបើមានបេក្ខភាពច្រើន ដែលយើងលេចលឺនៅរយៈពេលចុងក្រោយ ក្នុងការមកត្រៀមជំនួសតំណែងលោក Ole Gunnar Solskjaer តែតាមការយល់ឃើញនិងចង់បានរបស់អតីតគ្រូតាលោក Sir Alex Ferguson គឺមើលឃើញផ្សេង។
មតិជាច្រើនចង់បាន Antonio Conte, Zinedine Zidane ឬ Brendan Rodgers ជាដើមឲ្យមកដឹកនាំ United បន្តពីលោក Ole តែទៅមើលអតីតគ្រូសញ្ជាតិស្កុតឡែន បែរជាចុចឈ្មោះគ្រូអាហ្សង់ទីនគឺ Mauricio Pochettino ឯណោះវិញ។ នេះបើតាមសារព័ត៌មាន Daily Star បានចុះផ្សាយ។
ប្រភពបានឲ្យដឹងថា លោក Sir Alex ហាក់មានការស្រលាញ់ពេញចិត្តទៅលើ Pochettino ជាខ្លាំង ដោយគេក៏ធ្លាប់ចាយពេលដឹកនាំក្លឹប Tottenham នៅលីគកំពូលអង់គ្លេស ៥ ឆ្នាំស្រាប់ផងដែរ ដូច្នេះ Sir Alex ជឿជាក់លើបទពិសោធន៍ដែលគេមាន អាចយកមកជួយដោះស្រាយបញ្ហាដែល United កំពុងជួបប្រទះ។
គួរបញ្ជាក់ថា ស្ថានភាពដឹកនាំរបស់បុរសវ័យ ៤៩ ឆ្នាំនៅក្លឹប PSG ហាក់មិនឃើញជួបបញ្ហាអ្វីនោះទេ ដ្បិតអីសុពលភាពកុងត្រាក៏នៅយូរដល់ចុងខែមិថុនា ឆ្នាំ ២០២៣ ឯណោះ។ ប្រសិន Pochettino ព្រមដើរចេញមក Old Trafford នោះគ្រូថ្មីនៅ Parc des Prince ក៏មានភាគរយច្រើនអាចជា Zidane ផងដែរ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
