រកឃើញក្រុមទី ២ ឈោងបានកៅអីផ្លូវការ World Cup ជាមួយស្ថិតិលេងឈ្នះ ១០០ ភាគរយ
ការប្រកួតព្រឹត្តិការណ៍ FIFA World Cup 2022 ប្រសិនយើងមិនរាប់ក្រុមដែលធ្វើជាម្ចាស់ផ្ទះ គឺកាតា គិតមកទល់ពេលនេះមានក្រុមចំនួន ២ ហើយ ដែលបានឆ្លងផុតវគ្គជម្រុះ និងទទួលបានកៅអីស្វ័យប្រវត្តិមកកាន់ប្រកួតផ្លូវការ ដ្បិតការប្រកួតវគ្គជម្រុះបឋមនៅសល់ ២ ជុំទៀតក្តី។
ដំបូងឡើយនៅថ្ងៃទី ១១ តុលា យើងរកឃើញក្រុមជម្រើសជាតិអាល្លឺម៉ង់ជាក្រុមដំបូង ក្រោយមានពិន្ទុវ៉ាដាច់គេនៅពូល J ប្រចាំវគ្គជម្រុះបឋមក្នុងពូល នៅតំបន់អឺរ៉ុប។ ឥឡូវយើងរកបានក្រុមមួយផ្សេងទៀតនៅពូល F នោះគឺដាណឺម៉ាក ដែលពួកគេលេង ៨ ប្រកួត មិនទាន់ស្គាល់ពាក្យថា ចាញ់ និងស្មើ ពោលមានស្ថិតិឈ្នះ ១០០ ភាគរយ។
ដាណឺម៉ាក មាន ២៤ ពិន្ទុពេញ ក្រោយឆ្លងកាត់ ៨ ប្រកួត ខណៈសល់ ២ ប្រកួតចុងក្រោយផ្សេងទៀតគឺត្រូវប៉ះកោះហ្វារ៉ូ និងស្កុតឡែន បើបន្តឈ្នះទាំង ២ ប្រកួតនោះទៀត វានឹងក្លាយជាកំណត់ត្រាថ្មីមួយហើយសម្រាប់ជម្រើសជាតិដាណឺម៉ាក។
បញ្ជាក់ថា នៅតំបន់អឺរ៉ុប គឺយើងនឹងសម្រេចរកឃើញក្រុមជាច្រើនដែលត្រូវឡើងមកត្រឹមពាក់កណ្តាលខែវិច្ឆិកាខាងមុខនេះហើយ ខណៈនៅទ្វីបផ្សេងទៀតដូចជាអាស៊ី អាមេរិកឡាទីន និងអូសេអានីជាដើម នឹងឃើញលទ្ធផលជាបន្តបន្ទាប់។ ការប្រកួតផ្លូវការ FIFA World Cup 2022 នឹងធ្វើឡើងនៅថ្ងៃទី ២១ វិច្ឆិកា ដល់ថ្ងៃទី ១៨ ធ្នូ នាឆ្នាំក្រោយ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
