ហេតុតែចង់រួមជើង Messi ទោះអតីតក្លឹបចាស់ Ronaldo ហៅ ២ ដង ក៏ Aguero មិនព្រមទៅ
Sergio Aguero មុនផ្ទេរមកក្លឹប Barcelona កំឡុងពេលសល់កុងត្រាឆ្នាំចុងក្រោយជាមួយក្លឹប Man City សារនោះ គឺមានក្លឹបជាច្រើនចាប់អារម្មណ៍មកលើលោក តែយ៉ាងណាកីឡាករអាហ្សង់ទីន មានគោលដៅច្បាស់លាស់ គឺខ្លួនចង់ទៅលេងជាមួយ Leo Messi តែមួយគត់។
បុរសវ័យ ៣៣ ឆ្នាំ ក៏បានសម្រេចការផ្ទេរដូចការគ្រោងទុក តែស្តាយ Messi បែរជាត្រូវចាកចេញទៅកាន់ក្លឹបដទៃ ទុកឲ្យ Aguero នៅម្នាក់ឯងនៅក្លឹប Barcelona។ រំឭកទៅមុននោះ Aguero ក៏បានលះបង់ឱកាសផ្ទេរទៅក្លឹបយក្សដទៃទៀត រួមមានទាំង Juventus ដែលមានវត្តមាន Cristiano Ronaldo ផងដែរ។
តាមការចុះផ្សាយរបស់ Sport.ES បានឲ្យដឹងថា កំឡុងរដូវក្តៅឆ្នាំ ២០២១ ដែល Aguero ធ្វើការសម្រេចចិត្ត នឹងផ្ទេរទៅក្លឹបណា? ខាងភាគី Juventus បានដាក់សំណើមកដល់ទៅ ២ ដង តែខ្សែប្រយុទ្ធក្លឹប Man City បានច្រានចោល ព្រោះអីគិតថានឹងចង់ទៅលេងជាមួយ Messi នៅ Barcelona។
ដល់តែឥឡូវគ្រប់យ៉ាង ក៏ខុសពីការគ្រោងទុកហើយ Aguero ក៏ជាប់គាំងដោសារបញ្ហារបួស និងមិនទាន់បានបង្ហាញខ្លួនសូម្បី ១ នាទីលើទីលាននារដូវកាលថ្មី។ មតិជាច្រើនពីអ្នកគាំទ្រ ហាក់បង្ហាញការសោកស្តាយដូចគ្នាសម្រាប់ខ្សែប្រយុទ្ធអាហ្សង់ទីន ព្រោះអាជីពនៅ Barcelona មើលទៅមិនជាល្អឡើយសម្រាប់ការឈរជើងរបស់គេ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
