Koeman សម្លឹងឃើញកីឡាករដែល Man Utd បោះបង់មួយរូប ចង់នាំយកមក Barca
អ្នកចាត់ការក្លឹប Barcelona លោក Ronald Koeman បាននឹងកំពុងមើលឃើញកីឡាករសញ្ជាតិហូឡង់មួយរូបទៀតហើយ ចេញពីក្លឹប Man Utd នោះគឺ Donny van de Beek សម្រាប់ការផ្ទេរនៅទីផ្សារដោះដូរខាងមុខ។
អតីតខ្សែបម្រើរបស់ក្លឹប Ajax បានចាយពេលមួយឆ្នាំហើយនៅ Premier League តែគេមិនទទួលបានឱកាសចូលលេងទៀងទាត់ទាល់តែសោះ នាំឲ្យមានដំណឹងផ្ទុះឡើងថា de Beek ចង់អេះអុញសុំក្លឹបចែកផ្លូវត្រឹមរដូវរងា ខែមករាខាងមុខ។ ក្នុងចំណោមក្លឹបជាច្រើន ដែលមើលឃើញឱកាសដ៏ល្អនេះ ក៏មានក្លឹប Barcelona មួយផងដែរ។
តាមរបាយការណ៍ពី Sport លោក Koeman ចង់សុំឲ្យថ្នាក់លើ Barca បើកការចរចាយក de Beek មក Camp Nou នៅលក្ខខណ្ឌសមស្របណាមួយ ដោយជឿជាក់ថាគុណភាពរបស់កីឡាករវ័យ ២៤ ឆ្នាំ នឹងអាចជួយក្រុមរបស់ខ្លួនបាន។
សុពលភាពកុងត្រារបស់ខ្សែបម្រើខាងលើត្រូវផុតនៅចុងខែមិថុនា ឆ្នាំ ២០២៥ ឯណោះ តែសំខាន់កីឡាករផ្ទាល់គេចង់ចាកចេញ ហើយប្រសិនផ្ទេរមក Barca នៅសម័យកាល Koeman ដឹកនាំ ពិតណាស់ឱកាសបង្ហាញខ្លួននឹងទទួលបាន ១០០ ភាគរយ។ ហាងឆេងតម្លៃខ្លួនរបស់គេអាចថ្លៃចន្លោះពី ២០ ទៅ ២៥ លានអឺរ៉ូ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
