ដោយសារហេតុផលនេះ ទើប Newcastle ព្រមលក់ក្លឹបឲ្យសេដ្ឋីអារ៉ាប់ ទោះមានអ្នកផ្សេងហ៊ានឲ្យខ្ពស់ជាង ៣០០ លាន
សែស្រឡាយរាជវង្សនៃប្រទេសអារ៉ាប៊ីសាអ៊ូឌីត និងជាក្រុមហ៊ុន Saudi Arabia Public Investment Fund បានចំណាយលុយ ៣០០ លានផោន លើការទិញយកក្លឹប Newcastle United បន្តពីម្ចាស់ចាស់លោក Mike Ashley ក្រោយកាន់កាប់អស់រយៈពេល ១៤ ឆ្នាំ។
យ៉ាងណា Mike Ashley បានទម្លាយថា តាមពិតទៅ Newcastle មិនមែនទើបតែមានការចរចាទិញយកពេលនេះទេ ដោយកន្លងមកក៏មានច្រើនហើយដែរ ហើយមានគេឲ្យខ្ពស់ជាងលុយ ៣០០ លានហ្នឹងទៅទៀត តែមិនព្រមលក់ ដោយសារម្ចាស់ថ្មីមានចក្ខុវិស័យមិនច្បាស់លាស់ និងគិតថាមិនអាចដឹកនាំឲ្យ Newcastle ជោគជ័យទៅពេលអនាគតបាន។
ប្រាប់សារព័ត៌មាន TheSun លោក Ashley ថា៖ "ខ្ញុំចង់ឲ្យអ្នករាល់គ្នាដឹងថា ខ្ញុំធ្លាប់ទទួលបានសំណើខ្ពស់ជាងអ្វីដែលខ្ញុំទទួលយកពេលនេះទៅទៀត ដោយយើងទទួលបានពីអ្នកដេញថ្លៃដ៏ល្បីឈ្មោះមួយរូបទៀត ប៉ុន្តែខ្ញុំទទួលបានអារម្មណ៍ថា ម្ចាស់ថ្មីដែលយើងព្រមព្រៀងនេះ គាត់អាចដឹកនាំឲ្យក្លឹប Newcastle United ជួបរឿងល្អច្រើនជាង ដូច្នេះហើយលុយមិនមែនជាហេតុផលនៃការសម្រេចចិត្តរបស់ខ្ញុំទាំងស្រុងឡើយ"។
បញ្ជាប់ថា ចាប់តាំងពីការមកកាន់កាប់របស់លោក Mike Ashley នៅឆ្នាំ ២០០៧ សម្រាប់ក្លឹប Newcastle មិនទាន់មានឱកាសឈ្នះពានរង្វាន់ ឬកែប្រែមុខមាត់ជោគជ័យគួរឲ្យកត់សម្គាល់ណាមួយនោះទេ។ អ៊ីចឹងយើងចាំមើលយុគសម័យថ្មី ជាមួយម្ចាស់ថ្មីរាប់ពីឆ្នាំ ២០២១ នេះទៅ តើនឹងមានផ្លាស់ប្តូរបែបណាខ្លះ?
ប្រភព៖ TheSun
ព័ត៌មានថ្មីៗ
