Dortmund ត្រៀមកាដូធំនេះ ទុកថ្ពក់ចិត្ត Haaland ដើម្បីរារាំងការផ្ទេរទៅក្លឹបថ្មី
ក្លឹប Borussia Dortmund ប្រឈមនឹងបាត់បង់ Erling Haaland នៅរដូវក្តៅខាងមុខ ព្រោះអីតម្លៃផ្តាច់កុងត្រារបស់គេ នឹងចាប់ដំណើរការត្រឹមតែ ៦៤ លានផោនប៉ុណ្ណោះ ដែលមានន័យថា កម្រិតសមត្ថភាពដូចកីឡាករន័រវេស លុយប៉ុណ្ណឹងគឺបណ្តាក្លឹបយក្សនឹងមិនខ្លាចក្នុងការចំណាយឡើយ។
យ៉ាងណាក្លឹបអាណាព្យាបាលបច្ចុប្បន្នក៏មិនចង់បាត់បង់ខ្សែប្រយុទ្ធជំនាញក្នុងការរកគ្រាប់បាល់ខាងលើផងដែរ ហើយចង់ឲ្យ Haaland ព្រមបន្តកុងត្រាថ្មីតទៅមុខទៀត។
បើតាមអ្នកសារព័ត៌មានលោក Christian Falk លើកឡើងថា Dortmund ចង់ឲ្យ Haaland បានថ្លៃពលកម្មខ្ពស់ជាងមុនទ្វេដង ពោលគឺនឹងឡើងឲ្យដល់ ២៥០ ០០០ ផោន/សប្តាហ៍ ប្រសិនគេព្រមបន្តនៅ។
ទំហំថ្លៃពលកម្មនេះ បើសាមីខ្លួនយល់ព្រមទទួលយក នោះក៏អាចរុញឲ្យគេក្លាយជាកីឡាករស៊ីថ្លៃបំផុតលំដាប់ទី ៦ នៅ Bundesliga ដែលនៅចាញ់តែកីឡាករ Bayern Munich មាន Muller, Kimmich Sane, Neuer និង Lewandowski។ តែយ៉ាងណាតាមដំណឹងកន្លងមក ការផ្ទេរទៅក្លឹបថ្មី សម្រាប់ Haaland គេចង់បានថ្លៃពលកម្មលើសពី ៤០០ ០០០ ផោនឯណោះ ដូច្នេះជឿថា ២៥០ ០០០ ផោនសម្រាប់គេ ប្រហែលជាមិនអាចអូសទាញចិត្តគេបាននោះឡើយ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
