Lampard ថាលេងប៉ះ Ronaldo មិនគួរឲ្យខ្លាចជាងលេងប៉ះកីឡាករ ២ រូបនេះទេ
លោក Frank Lampard អតីតកីឡាករនិងជាអ្នកចាត់ការនៅក្លឹបតោខៀវ Chelsea ធ្លាប់បាននិយាយកាលពីពេលកន្លងទៅ ថា Cristiano Ronaldo មិនបានស្ថិតក្នុងបញ្ជីកីឡាករដែលលោកពិបាកតតាំងបំផុតទាំង ២ រូបនោះទេ ដ្បិតអីក្នុងចំណោមនោះ មានម្នាក់គឺជា Leo Messi។
ជាការពិតត្រលប់ទៅមុនឆ្នាំ ២០១០ Lampard ធ្លាប់បានតតាំង Ronaldo កាលលោកលេងឲ្យក្លឹប Man Utd ជាច្រើនលើកច្រើនសារ ហើយក្រោយពេល CR7 ផ្ទេរទៅ Real Madrid គឺអតីតកីឡាករអង់គ្លេសមិនសូវទទួលបានឱកាសញឹកញាប់ដូចមុនឡើយ។
Lampard ធ្លាប់បាននិយាយនៅប៉ុស្តិ៍កម្មវិធី All To Play For បែបនេះថា៖ "មាន ២ នាក់ដែលខ្ញុំចង់និយាយមួយគឺ Messi ដោយគេល្អបំផុតហើយ តែជាមួយ Ronaldo ខ្ញុំមានអារម្មណ៍ថា ខ្ញុំលេងទល់គេ ពេលគេមិនទាន់ឈានដល់កម្រិតកំពូលនោះឡើយ ដោយលេងតទល់គេនៅ Man Utd គឺស្ថិតក្នុងដំណាក់កាលគេឆ្ពោះទៅកម្រិតដ៏ខ្ពស់ប៉ុណ្ណោះ វាខុសពីកាលនៅក្លឹប Real Madrid ដែលគេពិតជាអស្ចារ្យខ្លាំង"។
លោកបន្ថែម៖ "ដោយឡែក Messi ខ្ញុំមិនដែលបានចូលក្បែរគេទេ ពេលប្រជែងលើទីលាន និយាយទៅគេពិតជាអស្ចារ្យណាស់ ហើយម្នាក់ទៀតគឺ Ronaldinho ដែលកាលពីឆ្នាំ ២០០៥ ពេលយើងទៅលេងនៅ Camp Nou គេជាសត្រូវដំបូងដែលខ្ញុំគិតថា គេជាមនុស្សក្រៅភព"៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
