Lewandowski ថាគោរព Benzema រឿងមួយនេះបំផុត តែមិនមែនរឿងរកគ្រាប់បាល់
Robert Lewandowski ទើបតែឡើងមកទទួលពានរង្វាន់ស្បែកជើងមាសប្រចាំតំបន់អឺរ៉ុប កាលពីរដូវកាលចាស់ ២០២០/២១ ដែលលោករកបាន ៤១ គ្រាប់នៅក្របខ័ណ្ឌ Bundesliga។
និយាយជុំវិញការទទួលពាន កីឡាកររបស់ក្លឹប Bayern Munich បានកោតសរសើរដល់ខ្សែប្រយុទ្ធក្លឹប Real Madrid គឺ Karim Benzema ថាកីឡាករបារាំង មិនត្រឹមតែធ្វើឲ្យលោកគោរពរឿងរកគ្រាប់បាល់មួយប៉ុណ្ណោះទេ ទៀតសោតរបៀបដែល Benzema បំផុសឲ្យកីឡាករក្នុងក្រុមទាំងមូលនៅពេលប្រកួត គឺជារឿងដែលខ្លួនគោរពបំផុត។
តាមការបញ្ជាក់ជាមួយ MARCA ខ្សែប្រយុទ្ធ Lewandowski និយាយ៖ "ខ្ញុំមិនត្រឹមតែគោរព Benzema ដោយសារការរកគ្រាប់បាល់របស់គាត់ប៉ុណ្ណោះទេ តែរបៀបដែលគាត់បំផុសឲ្យក្រុមទាំងមូលលេង ការខិតខំរបស់គាត់សម្រាប់ក្រុម គឺជាអ្វីដែលខ្ញុំចូលចិត្តគាត់បំផុត គាត់ជាកីឡាករដ៏ល្អម្នាក់"។
គួរបញ្ជាក់ថា នៅរដូវកាលថ្មី ២០២១/២២ Benzema ក៏កំពុងប្រជែងគ្រាប់បាល់ជាមួយ Lewandowski ម្តងទៀតផងដែរ ជាក់ស្តែង Lewandowski/Haaland មាន ៧ គ្រាប់ ខណៈ Benzema មាន ៦ គ្រាប់ គិតត្រឹមពាក់កណ្តាលសប្តាហ៍នេះ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
