AFF Suzuki Cup៖ គ្រូបង្វឹកជម្រើសជាតិម៉ាឡេស៊ីចង់ឲ្យកីឡាករផ្តោតអារម្មណ៍លើរាល់ការប្រកួត
ម៉ាឡេស៊ីនឹងត្រូវជួបក្រុមការពារតំណែងជើងេកវៀតណាម ឥណ្ឌូនេស៊ី កម្ពុជា និងឡាវក្នុងពូល B ក្នុងព្រឹត្តិការណ៍ AFF Suzuki Cup 2020 ដែលនឹងប្រព្រឹត្តទៅចាប់ពីថ្ងៃទី ៥ ខែធ្នូឆ្នាំ ២០២១ ដល់ថ្ងៃទី ១ ខែមករាឆ្នាំ ២០២២ ។
ជាមួយគ្នានេះពូល A នឹងមានក្រុមជើងឯក ៥ សម័យគឺថៃ មីយ៉ាន់ម៉ា ហ្វីលីពីន និងក្រុមជើងឯក ៤ សម័យសិង្ហបុរី និងក្រុមឈ្នះក្នុងវគ្គជម្រុះរវាងព្រុយណេ និងទីម័រខាងកើត។ ការប្រកួតជើងឯកអាស៊ីអាគ្នេយ៍លើកទី ១៣ ត្រូវបានគេរំពឹងថានឹងប្រព្រឹត្តទៅនៅចុងឆ្នាំ ២០២០ ប៉ុន្តែត្រូវពន្យារពេលរហូតដល់ខែមេសាឆ្នាំ ២០២១ ហើយបន្ទាប់មកត្រូវប្តូរទៅជាកាលបរិច្ឆេទថ្មីនៅខែធ្នូនេះដោយសារការរីករាលដាលនៃជំងឺកូវីដ ១៩ ។
សម្រាប់លោក Tan Cheng Hoe គ្រូបង្វឹកក្រុមជម្រើសជាតិម៉ាឡេស៊ី ថាការលទ្ធផលចាប់ឆ្នោតនៅពេលនេះគឺមិនមានអ្វីប្លែកនោះទេ ព្រោះនៅក្នុងព្រឹត្តិការណ៍ AFF Suzuki Cup 2018 ម៉ាឡេស៊ីត្រូវបានចាប់ឆ្នោតមួយពូលជាមួយវៀតណាម មីយ៉ាន់ម៉ា កម្ពុជា និងឡាវមុននឹងយកឈ្នះថៃនៅវគ្គពាក់កណ្តាលផ្តាច់ព្រ័ត្រដើម្បីជួបវៀតណាម នៅវគ្គផ្តាច់ព្រ័ត្រ។
"ខ្ញុំគិតថាការចាប់ពូលលើកនេះមិនមានអ្វីប្លែកនោះទេ ព្រោះរាល់ពេលការប្រកួតនៅកម្រិតអាស៊ីអាគ្នេយ៍យើងនឹងជួបជាមួយប្រទេសទាំងនោះ ទោះបីស្ថិតក្នុងការប្រកួតលើកម្រិតយុវជនក៏ដោយដូច្នេះអ្នករាល់គ្នាស្គាល់ក្រុមទាំងនោះហើយ"។
“ ជាការពិតយើងដឹងថាវៀតណាមគឺជាក្រុមជម្រើសក្នុងពូល B ហើយសំខាន់បំផុតយើងត្រូវផ្តោតអារម្មណ៍ពីការប្រកួតមួយទៅការប្រកួតមួយទៀត"។
“ ក្នុងពេលជាមួយគ្នានេះ យើងក៏ត្រូវផ្តោតមិនត្រឹមតែទៅលើប្រទេសវៀតណាមនោះទេ យើងដឹងថាឥណ្ឌូនេស៊ីគឺជាសត្រូវប្រពៃណីរបស់យើង យើងមិនអាចមើលស្រាលកម្ពុជាបានទេ ព្រោះពួកគេមានកីឡាករដែលមានទេពកោសល្យ"។
លោក Cheng Hoe បានប្រាប់គេហទំព័រ www.fam.org.my បន្ទាប់ពីពិធីចាប់ឆ្នោតជ្រើសរើសពូលថា៖“ ខណៈឡាវ! ទោះបីពួកគេស្ថិតនៅក្នុងលំដាប់ទី ៥ ក៏ដោយយើងត្រូវតែផ្តោតអារម្មណ៍លើរាល់ការប្រកួត” ។
“ យើងដែលជាគ្រូបង្វឹកនឹងតែងតែតាមដានការសម្តែងរបស់ក្រុម ឬកីឡាកររបស់យើង។ ជាមួយគ្នានេះយើងក៏ត្រូវមើលទៅលើការរៀបចំក្រុមរបស់ប្រទេសផ្សេងៗផងដែរ។
លោក Cheng Hoe បានមានប្រសាសន៍ថា៖“ យើងសង្ឃឹមថាកីឡាករដែលត្រូវបានកោះហៅក្នុងការការប្រកួតលើកនេះនឹងអាចផ្តល់នូវការរួមចំណែកដ៏ល្អបំផុតដល់ក្រុមជម្រើសជាតិ” ។
នៅពេលសួរអំពីគោលដៅរបស់ក្រុមខ្លារខិនម៉ាឡេយ៉ានសម្រាប់ការប្រកួតពានរង្វាន់ AFF Suzuki Cup 2020 លោក Cheng Hoe បាននិយាយថា៖“ ក្នុងនាមជាគ្រូបង្វឹកយើងចង់បានគោលដៅល្អបំផុតរាល់ពេលដែលយើងចូលប្រកួត។ ពិតណាស់យើងមិនអាចមើលស្រាលការប្រកួតទាំងនោះទេ យើងនៅតែត្រូវផ្តោតអារម្មណ៍លើរាល់ការប្រកួត។ "
AFF Suzuki Cup លេងបាន ១២ លើកហើយ ខណៈម៉ាឡេស៊ីឈ្នះបានតែម្ដងគត់នៅក្នុងការយុទ្ធនាកាឆ្នាំ ២០១០ ក្រោមការដឹកនាំរបស់ Datuk K. Rajagobal និងបានជើងឯករងបីដងក្នុងឆ្នាំ ១៩៩៦, ២០១៤ និង ២០១៨ ៕
រក្សាសិទ្ធិដោយ៖ ក្នុងស្រុក
អំពីអ្នកសរសេររបស់យើង៖ PECH PHEARUN
Tel:
ព័ត៌មានថ្មីៗ
