ខ្សែការពារ Man City៖ “ការមកដល់របស់ Ronaldo ពិតណាស់នឹងជួយ Man Utd រឿងនេះ”
ខ្សែការពាររបស់ក្លឹប Man City និងជម្រើសជាតិព័រទុយហ្គាល់ គឺ Ruben Dias បានបង្ហាញការយល់ឃើញ អំពីការមកដល់របស់ Cristiano Ronaldo នៅក្លឹបគូប្រជែង Man Utd។ បញ្ជាក់ថា Dias នឹងមានឱកាសប្រជែង CR7 ក្នុងនាមជាសត្រូវលើទីលាន កំឡុងការប្រកួតជើងទី ១ ដែលត្រកូល Manchester ទាំងពីរត្រូវជួបគ្នា នាថ្ងៃទី ៦ វិច្ឆិកា ឆ្នាំ ២០២១ ខាងមុខ។
និយាយប្រាប់សារព័ត៌មាន A Bola កន្លងទៅ ខ្សែការពាររួមសញ្ជាតិខាងលើ បាននិយាយច្បាស់ៗថា វត្តមាន Ronaldo នឹងជួយឲ្យក្លឹបបិសាចក្រហម មានឱកាសកាន់តែច្រើនបន្ថែមទៀត លើការប្រជែងពាន Premier League រដូវកាល ២០២១/២២។
Dias ថា៖ "Cristiano ពីមួយឆ្នាំទៅមួយ គាត់នៅតែបន្តស្ថិតនៅកម្រិតដ៏ខ្ពស់ ហើយនេះគាត់បានបង្ហាញវាជាថ្មី គាត់ត្រលប់មកលីគដែលមានការប្រកួតប្រជែងបំផុតក្នុងលោក និងជាក្លឹបមួយដែលពោរពេញដោយមហិច្ឆតា វាជាការបោះជំហានដ៏ធំសម្រាប់គាត់"។
លោកបន្ថែម៖ "យើងនឹងមិនអាចទស្សន៍ទាយបានទេពីអនាគតទៅមុខ តែជាការពិត United នឹងទទួលបានការពង្រឹងបន្ថែម ហើយនឹងក្លាយជាបេក្ខភាពក្លឹបអាចឈ្នះពានកាន់តែសង្ឃឹមច្រើនជាងមុន"៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
