Zidane បង្ហាញមតិយ៉ាងម៉េចពេលលឺព័ត៌មានថា CR7ចង់ត្រឡប់ទៅ Real Madrid វិញ?
Marca បានរាយការណ៍ថាកំពូលតារាព័រទុយហ្កាល់ Cristiano Ronaldo អាចនឹងវិលត្រឡប់មកកាន់ Real Madrid វិញនៅរដូវកាលក្រោយ ហើយ Zidane និយាយថា Cristiano គឺជាកីឡាករពិសេសម្នាក់ដែលបានបង្កើតប្រវត្តិសាស្ត្រនៅ Santiago Bernabeu ។
ទោះយ៉ាងណាក៏ដោយ គ្រូបង្វឹកសញ្ជាតិបារាំងថា បច្ចុប្បន្នកីឡាករវ័យ៣៦ ឆ្នាំនៅក្លឹបសេះបង្កង់ Juventus ហើយវាមិនសមហេតុផលទេក្នុងការពិភាក្សាកីឡាកររបស់ក្រុមផ្សេងទៀត។
លោក Zinedine Zidane បានប្រាប់អ្នកយកព័ត៌មាននៅពេលសួរទៅកាន់ការអត្ថាធិប្បាយអំពីពាក្យចចាមអារាមដែលភ្ជាប់កីឡាករ Cristiano Ronaldo ជាមួយនឹងការវិលត្រឡប់មកកាន់ទឹកដី Bernabeu វិញថា៖ “ អ្នកដឹងថាគាត់មានន័យយ៉ាងម៉េចចំពោះ Real Madrid និងសេចក្តីស្រឡាញ់ដែលយើងទាំងអស់គ្នាមានចំពោះគាត់"។
"គាត់បានបង្កើតប្រវត្តិសាស្ត្រនៅទីនេះ និងអស្ចារ្យ។ គាត់គឺជាកីឡាកររបស់ក្រុម Juventus ហើយគាត់កំពុងធ្វើបានល្អនៅទីនោះ។ មានរឿងជាច្រើនត្រូវបាននិយាយ ប៉ុន្តែគាត់គឺជាកីឡាកររបស់ក្រុម Juventus ហើយខ្ញុំត្រូវតែគោរពដែរ"។
យោងតាមសារព័ត៌មាន Marca បានអោយដឹងថា Cristiano កំពុងពិចារណាក្នុងការវិលត្រឡប់ទៅកាន់ Real Madrid ខណៈដែលភ្នាក់ងាររបស់គាត់បានធ្វើការពិភាក្សាជាមួយក្លឹបរួចហើយ។
កីឡាករជម្រើសជាតិព័រទុយហ្កាល់រួមរស់ជាមួយស្ដេចអស់រយៈពេល ៩ ឆ្នាំ។ គាត់បង្ហាញខ្លួនបាន ៤៣៨ ប្រកួតស៊ុតបញ្ចូលទី ៤៥០ គ្រាប់និងបញ្ជូនបាល់ឲ្យមិត្ររួមក្រុមស៊ុតបញ្ចូលទី១៣២លើក។
បច្ចុប្បន្ន Ronaldo មានអាយុ ៣៦ ឆ្នាំហើយ ប៉ុន្តែគាត់ស្ថិតក្នុងទម្រង់លេងយ៉ាងល្អសម្រាប់ Juventus ដោយរកបាន ២៧ គ្រាប់ក្នុង ៣២ ប្រកួតនៅរដូវកាលនេះ៕
រក្សាសិទ្ធិដោយ៖ ក្នុងស្រុក
អំពីអ្នកសរសេររបស់យើង៖ PECH PHEARUN
Tel:
ព័ត៌មានថ្មីៗ
