លើកទី១ មានក្រុមហ៊ុនសំលៀកបំពាក់អនឡាញធំជាងគេនៅកម្ពុជា បង្កើតព្រឹត្តិការណ៍ចែកសំបុត្រកុន Free ដើម្បីគាំទ្ររឿងខ្មែរមានគុណភាព «ដើម្បីកូន » (មានវីដេអូ)
ជាការពិតណាស់ ថ្មីៗនេះ ខ្សែភាពយន្តខ្នាតធំ «ដើម្បីកូន » ដែលជាស្នាដៃផលិត ដឹកនាំ និងសម្តែង ដោយផលិតករដែលមានបទពិសោធន៍ ២០ឆ្នាំនៅក្នុងវិស័យផលិតភាពយន្ត ថែមទាំងជាម្ចាស់ពានរង្វាន់ទស្សនិកជនគាំទ្រច្រើនជាងគេ « រឿងធ្មប់» ប្រចាំឆ្នាំ ២០១៩ លោក ហ៊ុយ យ៉ាឡេង ហៅ កថាជ័យ បានធ្វើឱ្យកក្រើកដល់ទស្សនិជន និងអ្នកគាំទ្រជាថ្មីម្តងទៀតហើយ ជាមួយភាពយន្តប្លែកថ្មីបង្កប់នូវគំនិតអប់រំមួយនេះ។
«ដើម្បីកូន » អាចនិយាយបានថាជាខ្សែភាពយន្តខ្នាតធំបែបអប់រំដំបូងគេ ដែលមានគុណភាព ក្រោមគំនិតថ្មីរបស់អ្នកផលិតផលផ្ទាល់ ដែលចង់សាកចេញឆ្ងាយពីរឿងបែបខ្មោច និងរន្ធត់ម្តង ដោយងាកមកផលិតរឿងផ្តល់តម្លៃអប់រំ ថែមទាំងជួយដល់សង្គមតាមរយៈថវិកា ១០% នៃការលក់សំបុត្រនឹងធ្វើការបរិច្ចាកដល់មន្ទីរពេទ្យគន្ធបុប្ផាដោយផ្ទាល់។
ដោយសារតែមើលឃើញនូវខ្សែភាពយន្តផលិតដោយស្នាដៃកូនខ្មែរ ពោរពេញដោយឈុតឆាកកម្សត់ ទប់ទឹកភ្នែកមិនបាន ថែមទាំងមានការអប់រំ និងជួយសង្គមតាមរយៈការលក់សំបុត្រទស្សនាខ្សែភាពយន្តនេះហើយ បានធ្វើឱ្យក្រុមហ៊ុនលក់សំលៀកបំពាក់អនឡាញធំជាងគេនៅកម្ពុជា Little Fashion (L192) បានបង្កើតព្រឹត្តិការណ៍មួយ ដោយធ្វើការចែកសំបុត្រកុនហ្វ្រីរឿង « ដើម្បីកូន » ដើម្បីសម្តែងនូវការគាំទ្រ និងលើកស្ទួយវិស័យភាពយន្តកម្ពុជា ព្រមទាំងជាចំណែកមួយក្នុងការជួយដល់មន្ទីរពេទ្យគន្ធបុប្ផាផងដែរ។
គួរឱ្យដឹងផងដែរថា ព្រឹត្តិការណ៍ចែកសំបុត្រកុនហ្វ្រីរឿង ដើម្បីកូន នេះ បានធ្វើឡើងកាលពីថ្ងៃ សៅរិ៍ ទី ៨ ខែកុម្ភៈ ឆ្នាំ ២០២០ នៅរោងភាពយន្ត Legend Cinema សាខា Eden Garden បឹងកក់ ដោយមានការចូលរួមពីអ្នកគាំទ្រជាច្រើន ជាពិសេសថែមទាំងមានវត្តមានលោក ហ៊ុយ យ៉ាឡេង ហៅ កថាជ័យ មកធ្វើការពញ្ញាក់អារម្មណ៍ធ្វើការថ្លែងអំណរគុណទស្សនិកជនដោយផ្ទាល់ ក្រោយទស្សនាចប់ ក្រោមស្នូរទះដៃកងរំពងក្នុងរោងកុនទៀតផង៕
សូនទស្សនារូបភាព និងវីដេអូខាងក្រោមនេះ ៖
ព័ត៌មានថ្មីៗ
