Conte ថាកីឡាកររូបនេះមានទេពកោសល្យហើយ តែត្រូវខំប្រឹងឲ្យខ្លាំង បើចង់ជោគជ័យ
លោក Antonio Conte អ្នកចាត់ការថ្មី ក្លឹប Tottenham Hotspur បានធ្វើការព្រមានទៅកាន់កីឡាករក្នុងក្រុម លេងនៅតំណែងបម្រើគឺ Tanguy Ndombele ថាត្រូវតែខិតខំឲ្យបានខ្លាំង ជាងកីឡាករណាទាំងអស់ ប្រសិនចង់ជោគជ័យនៅក្លឹប។
បុរសវ័យ ២៤ ឆ្នាំ ប្រហែលជាគ្នាយើងមិនភ្លេចនោះទេ ដែលគេបានផ្ទេរចេញពីក្លឹប Lyon មកកាន់ Spurs នៅតម្លៃខ្លួន ៥៣,៨ លានផោនកាលពីឆ្នាំ ២០១៩។ យ៉ាងណា Conte និយាយបែបនេះថា៖ "ខ្ញុំបានឃើញអ្នកចាត់ការជាច្រើនជួបបញ្ហានៃការប្រើប្រាស់ Ndombele ដោយជាការពិត គេជាកីឡាករមានគុណភាព តែទន្ទឹមគ្នានោះ គេក៏ត្រូវយល់ច្បាស់ពីរបៀបដែលគេអាចមកចូលលេងបានដែរ"។
លោកបន្ត៖ "ខ្ញុំគិតថា វាសំខាន់ណាស់ដែលយើងត្រូវដឹងថា តំណែងរបស់យើងត្រូវធ្វើបែបណាខ្លះ ជារួមយើងខិតខំខ្លាំងជាមួយ Ndombele ហើយខ្ញុំក៏គិតថាគេត្រូវតែខិតខំខ្លាំងជាងកីឡាករណាទាំងអស់ក្នុងក្រុមដូចគ្នា ដូចខ្ញុំនិយាយអ៊ីចឹង គេមានទេពកោសល្យ តែក្រុមរបស់យើងមិនមែនមានកីឡាករតែម្នាក់ទេ ដូច្នេះគេត្រូវតែចេះពីរបៀបប្រើប្រាស់ទេពកោសល្យដែលខ្លួនមាន"។
គួរបញ្ជាក់ថា កីឡាករបារាំងនៅរដូវកាល ២០២១/២២ គេមិនសូវបានលេងជាប់លាប់នោះទេ ដោយបង្ហាញខ្លួន ១១ ប្រកួត រកបាន ២ គ្រាប់ តែគិតចំនួននាទីឈរជើងសុទ្ធ បានតែជាង ៦០០ នាទី ធៀបនឹងកីឡាករសកម្មឯទៀត ចូលដល់ជាង ១ ពាន់នាទី៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
