ក្រហើយកូនឈឺទៀត! Xavi នឹងត្រូវអវត្តមានកីឡាករសំខាន់ម្នាក់ ដល់ចប់ឆ្នាំ ២០២១
កំពុងតែខ្វះខាតកីឡាករផង ឥឡូវស្រាប់តែក្រុម Barcelona លឺថា របួសកីឡាករសំខាន់លេងតំណែងបម្រើ ត្រូវខកខានដល់បញ្ចប់ឆ្នាំ ២០២១ ពោលគឺចូលដល់ឆ្នាំ ២០២២ ទើបគេអាចត្រលប់មកចូលរួមសារជាថ្មី។
នោះគឺបុរសវ័យ ១៨ ឆ្នាំ Pedri ដែលគេមមាញឹកខ្លាំងទាំងការលេងឲ្យក្លឹបនិងជម្រើសជាតិនៅឆ្នាំ ២០២១។ តែយ៉ាងណារដូវកាលថ្មី គេទើបលេងបាន ៤ ប្រកួតប៉ុណ្ណោះ ហើយតាមស្ថានភាពរបួសចុងក្រោយ គេប្រហែលជាត្រូវអវត្តមានរយៈពេលជាង ១ ខែពេញបន្ថែមទៀត។
បើតាមសារព័ត៌មាន Esport3 បានចុះផ្សាយ របួសភ្លៅ ដែលកីឡាករអេស្ប៉ាញកំពុងសម្រាកព្យាបាលពេលនេះ ស្ថានភាពគឺមិនទាន់ជាសះស្បើយ ១០០ ភាគរយនៅឡើយ ដែលនាំឲ្យ Xavi Hernandez ជាអ្នកចាត់ការថ្មី ក៏មិនអាចប្រថុយប្រើប្រាស់គេបានដែរ ជារួមគឺនឹងរង់ចាំដល់ចូលឆ្នាំថ្មី ២០២២ នាខែមករា ទើបអាចប្រើប្រាស់គេបាន។
គួររំឭកថា Pedri ជាកីឡាករសំខាន់ដែល Xavi សម្លឹងមើលលើផែនការណ៍រយៈពេលយូរ ជាពិសេសត្រៀមទុកចង់ប្រើប្រាស់នៅតំណែងអាទិភាព ជំនួស Frenkie de Jong ដែលក្លឹបមានបំណងលក់ចេញនៅពេលខាងមុខផងដែរ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
