ទុកយកមកជំនួស Salah! នេះ Liverpool ចង់ឲ្យចំណូលថ្មីម្នាក់ ស៊ីថ្លៃខ្ពស់ដាច់គេប្រចាំលីគ PL
ក្លឹបហង្សក្រហម Liverpool ត្រូវបានគេរាយការណ៍ថា កំពុងរៀបចំសំណើចង់ថ្ពក់យកកីឡាករសំខាន់មួយរូបពីក្លឹបបារាំង Paris Saint-Germain នោះគឺ Kylian Mbappe ដើម្បីទុកយកមកជំនួស វត្តមាន Mohamed Salah នៅពេលខាងមុខ។
ជាការពិតកីឡាករអេហ្សីបមិនទាន់សម្រេចការបន្តកុងត្រាថ្មីនៅឡើយ ហើយមានភាគរយច្រើនគេអាចជាចាកចេញនៅរដូវក្តៅខាងមុខ។ ដូចគ្នាទៅនឹង Liverpool បើលក់ Salah ចេញបាន នោះក្លឹបនឹងកើបលុយមិនក្រោម ១០០ លានផោនឡើយ លើតម្លៃផ្ទេរចេញ។
តាមរបាយការណ៍ Defensa Central ចុះផ្សាយថា Liverpool កំពុងសម្លឹងមើលឱកាសល្អ ដែល Mbappe កៀកនឹងផុតកុងត្រានៅខែមិថុនាឆ្នាំ ២០២២ ហើយចង់ផ្តល់ជូនថ្លៃពលកម្មក្រាស់ក្រែល ២៥ លានផោន/ឆ្នាំ ឬប្រហែល ៤៨០ ០០០ ផោន/សប្តាហ៍ (អាចជាប់ឈ្មោះជាកីឡាករស៊ីថ្លៃដាច់គេនៅ PL) សម្រាប់កីឡាករបារាំង ប្រសិនគេព្រមផ្ទេរមក Anfield។
នេះមានន័យថា បើ Liverpool យកបាន Mbappe ទំហំថ្លៃពលកម្មប៉ុណ្ណេះពិតណាស់ គឺដឹងតែហង្សនឹងលក់នរណាម្នាក់ចេញពីក្លឹបហើយ ដើម្បីសម្រួលតុល្យភាពនៃការចំណាយ។ មួយទៀតសោតបើយើងទៅមើល Salah ផ្ទាល់ គេក៏ទាមទារឡើងថ្លៃពលកម្មដល់ជិត ៥០ មុឺនផោនដែរ អ៊ីចឹងមានភាគរយទាបណាស់ដែលហង្សអាចយល់ព្រម ប្រសិនក្លឹបចង់បានយុវជនរបស់ PSG ពិតមែន៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
