Laporta ថាបើកផ្លូវជានិច្ច បើអតីតវីរបុរស ២ រូបនេះ ចង់វិលត្រលប់មកជួយក្លឹប Barcelona
អស់ពីការវិលត្រលប់ជាថ្មីរបស់ Dani Alves ឥឡូវប្រធានក្លឹប Barcelona លោក Joan Laporta បានបញ្ជាក់ច្បាស់ៗថា អនាគតទៅមុខ ប្រសិនវីរបុរស ២ រូបផ្សេងទៀត មានចិត្តចង់ត្រលប់មកដែរ គឺលោកមានតែបើកដៃស្វាគមន៍ជានិច្ច ពោលគ្មានការឃាត់ឃាំងអ្វីឡើយ។
នោះគឺសំដៅទៅដល់ Lionel Messi ដែលបច្ចុប្បន្នកំពុងលេងនៅក្លឹប PSG និង Andres Iniesta លេងនៅក្លឹបជប៉ុន Vissel Kobe។ អ្នកទាំងពីរ សុទ្ធសឹងធ្លាប់ជាមិត្តរួមក្រុមនឹងគ្នា រួមជើងទាំងនៅជំនាន់ Xavi ដែលជាអ្នកចាត់ការបច្ចុប្បន្ន ដូច្នេះបើអាចត្រលប់មកវិញជាថ្មី នោះនឹងក្លាយជារឿងដ៏អស្ចារ្យបំផុតមួយ។
ប្រាប់កាលពីពេលកន្លងទៅ ប្រធានក្លឹបលោក Laporta មានប្រសាសន៍ថា៖ "ខ្ញុំមិនឃាត់ឃាំងអ្វីទេ [ជុំវិញការចង់ត្រលប់របស់ Messi ឬ Iniesta] ដោយកន្លងទៅបានកើតឡើងលើ Dani Alves ហើយ ខ្ញុំពិតជាចង់អរគុណគេ ព្រោះក្រោយគេបានឃើញស្ថានភាពរបស់ក្លឹប ហើយគេស្ម័គ្រស្មោះនឹងវិលមកជួយពួកយើង"។
លោកបន្ថែមថា៖ "ខ្ញុំក៏អរគុណគេ សម្រាប់ការយោគយល់លើផ្នែកហិរញ្ញវត្ថុ ពេលនេះ យើងកំពុងព្យាយាមបង្វែរស្ថានការណ៍ឲ្យត្រលប់មករកភាពល្អប្រសើរវិញ រីឯ Messi និង Iniesta គឺជាកីឡាករដ៏អស្ចារ្យ ខ្ញុំមិនអាចថាទស្សន៍ទាយទុកមុនទេពីអនាគត តែពួកយើងនៅតែដក់ជាប់ឈ្មោះរបស់ពួកគេក្នុងការគិត គ្រាន់ថាពួកគេនៅជាប់កុងត្រាជាមួយក្លឹបអាណាព្យាបាលបច្ចុប្បន្ន ដូច្នេះយើងក៏ត្រូវមានការគោរពចំពោះរឿងហ្នឹងដែរ"៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
