ក្លឹប Chelsea កំពុងគិតគូរ ត្រៀមនាំយកកីឡាករក្រៅជម្រើសរបស់ Juventus មួយរូប
ក្លឹបសេះបង្កង់ Juventus ត្រូវបានគេរាយការណ៍ថា កំពុងមានបំណងចង់វ៉ៃចេញកីឡាករក្នុងក្រុមមួយរូប ដែលក្លឹបមិនសូវប្រើប្រាស់ ហើយគួបផ្សំនឹងតម្លៃពលកម្មរបស់គេស៊ីថ្លៃក្រាស់ក្រែលផង ដូច្នេះជឿថា ការដកចេញត្រឹមទីផ្សារដោះដូរខាងមុខ គឺជាការសម្រេចចិត្តដ៏ល្អ។
នោះគឺខ្សែបម្រើ Adrien Rabiot ដែលបានមករួមជើងនៅ Juventus ប៉ុន្មានឆ្នាំមកហើយ តែក្រោមការដឹកនាំរបស់លោក Massimiliano Allegri គេមិនសូវទទួលបានឱកាសបង្ហាញខ្លួនជាប់លាប់ឡើយ ជាក់ស្តែងដូចរដូវកាលនេះ ទើបតែលេងបានជាង ៧០០ នាទី និង Assist ១ លើក ធៀបនឹងកីឡាករសកម្មមិនក្រោម ១ ពាន់នាទីនោះទេ។
បើតាមសារព័ត៌មាន Calciomercato ចុះផ្សាយថា ក្លឹបតោខៀវ Chelsea កំពុងចាប់អារម្មណ៍លើកីឡាករបារាំងខាងលើ ដោយចង់ចរចាយកគេមក Stamford Bridge នាពេលខាងមុខ ពោលគឺក្រោយពេលជ្រេចេញ Saul Niguez ឲ្យទៅក្លឹបអាណាព្យាបាល Atletico Madrid រួចរាល់។
គួរបញ្ជាក់ថា សុពលភាពកុងត្រារបស់ Rabiot ត្រូវផុតនៅចុងខែមិថុនា ឆ្នាំ ២០២៣ ហើយតាមតម្លៃខ្លួនរបស់គេ អាចថ្លៃល្បាក់ ៣០ លានអឺរ៉ូ។ សម្រាប់ Juventus ក្រៅពី Rabiot ក៏អាចជាមាន Aaron Ramsey ម្នាក់ទៀតផងដែរ ដែលនឹងអាចចាកចេញ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
